Florida do Norte Central

Florida do Norte Central (inglés: North Central Florida) é unha rexión de tipo direccional dentro do estado de Florida, nos Estados Unidos, que comprende a parte norte central do Estado e engloba a Área Metropolitana de Gainesville (nos condados de Alachua e Gilchrist) e os condados da super-rexión de Florida do Norte de Bradford, Columbia, Hamilton, Lafayette, Madison, Marion, Putnam, Suwannee e Union. A maior cidade da rexión é Gainesville (sede da Universidade de Florida), mentres que a maior área metropolitana é a Área Metropolitana de Ocala. Outras cidades de importancia na rexión son Lake City, Live Oak e Palatka. No ano 2010 a rexión acadou unha poboación de 873.189 habitantes.

Localización de Florida do Norte Central dentro do Estado

Localización da Área Estatística Metropolitana de Gainesville dentro de Florida

Mapa dos condados de Florida do Norte Central

Florida do Norte Central
Condados	Alachua, Bradford, Columbia, Gilchrist, Hamilton, Lafayette, Madison, Marion, Putnam, Suwannee e Union
Cidades maiores	Gainesville Ocala Palatka Lake City

Do mesmo xeito que a chamada rexión da Franxa de Florida, esta rexión é recoñecida a miúdo como parte do chamado Sur Profundo, igual có resto do Estado. A maioría dos brancos americanos en Florida do Norte Central son tradicionalmente descendentes de devanceiros ingleses sen mesturas.

A paisaxe e o clima de Florida do Norte Central non responde ao clima subtropical, típico de Florida. A súa paisaxe é de suaves outeiros dominados por magnolios e grandes aciñeiros do sur cubertos de brións españois.

A rexión tamén dispón de grandes bosques de piñeiros. O clima é bastante amornado durante todo o ano, pero ten invernos moi diferentes con temperaturas que caen por baixo de cero con bastante frecuencia.

Localización

O condado máis ao sur de Florida do Norte Central, o Condado de Marion, limita co norte de Florida Central e algunhas rexións da área xeográfica da Costa Natural. Outros moitos condados da rexión limitan coa Costa Natural, incluíndo a Alachua, Gilchrist e Hamilton. Florida do Norte Central non está afectada polos furacáns tanto como os seus condados veciños do leste e o oeste.

Vilas e cidades

Florida do Norte Central ten unhas poucas cidades e moitas vilas ou asentamentos poboacionais, algúns ao longo das ribeiras de ríos e lagos.

Nome da poboación	Tipo de poboación	Condado	Habitantes
Alachua	Cidade	Alachua	9.272
Belleview	Vila	Marion	4.509
Bell	Aldea	Gilchrist	549
Brooker	Aldea	Bradford	334
Fort White	Aldea	Columbia	556
Gainesville	Cidade	Alachua	126.047
Greenville	Aldea	Madison	824
Hampton	Aldea	Bradford	495
Hawthorne	Vila	Alachua	1.428
High Springs	Vila	Alachua	5.494
Interlachen	Vila	Putnam	1.396
Jasper	Vila	Hamilton	5.452
LaCrosse	Aldea	Alachua	360
Lake City	Cidade	Columbia	12.099
Lawtey	Aldea	Bradford	730
Lee	Aldea	Madison	386
Live Oak	Cidade	Suwannee	6.919
Madison	Vila	Madison	2.769
Micanopy	Aldea	Alachua	606
Ocala	Cidade	Marion	56.945
Palatka	Cidade	Putnam	10.472
Pomona Park	Aldea	Putnam	908
Reddick	Aldea	Marion	508
Starke	Vila	Bradford	5.405
Trenton	Vila	Gilchrist	1.988
Waldo	Vila	Alachua	1.022

Atracións de Florida do Norte Central

A diferenza da Florida Central e da Costa do Sol, Florida do Norte Central non ten moitos parques de atraccións ou grandes parques temáticos. No seu lugar, contan con moitos parques de natureza. Tamén ten moitas pequenas vilas da época do cambio de século que representan á cultura Sur Profundo.

Unha importante atracción de Florida do Norte Central é ser a principal localización da Universidade de Florida e sede dos estadios dos seus equipos deportivos, os Florida Gators.