Ferrol Vello

Na Galipedia, a Wikipedia en galego.
Unha vista de Ferrol Vello ou Ferroliño desde os peiraos
O nome da rúa do Castro evoca as orixes de Ferrol no Ferrol Vello.

Ferrol Vello é un conxunto histórico, orixe mariñeiro da cidade de Ferrol, orientado cara ao porto e refuxiado no fondo da ría de xeito compacto.

Evolución e características[editar | editar a fonte]

Ata o século XVIII a vila de Ferrol non se estendía alén do propio Ferrol Vello e dependía das casas nobiliarias dos Lemos e dos Andrade. A comunicación co exterior facíase especialmente por mar sendo a comunicación por terra de case illamento. Ao longo do tempo mantivo a súa estrutura medieval dun xeito continuado, aínda apreciable no trazado viario e no parcelario urbano.

A tipoloxía edificatoria é diversa e vai dende casas con solaina e tipicamente mariñeiras ata aqueles edificios que presentan unha notable arquitectura art déco modernista ou racionalista. O seu estado de conservación é deficiente e as intervencións das últimas décadas moi desafortunadas.

Protección[editar | editar a fonte]

O barrio de Ferrol Vello está protexido dende o ano 2001 como conxunto dentro do PXOM. No 2006 solicitouse pola denominada Comisión cidadá para a recuperación de Ferrol Vello a súa declaración como Ben de Interese Cultural á Consellería de Cultura e Deporte que, naquel momento, dirixía a conselleira do BNG Ánxela Bugallo. A incoación do procedemento para declarar Ben de Interese Cultural produciuse 27 de Febreiro do ano 2009, dous días antes das eleccións ao Parlamento de Galicia. Logo de case 24 meses de procedemento administrativo, no que inicialmente se deixou sen efecto a incoación da declaración, Ferrol Vello foi declarado Ben de Interese Cultural, en categoría de Conxunto Histórico, polo Consello da Xunta de Galicia o 10 de febreiro de 2011, admitindo os recursos da Comisión Cidadá Pola Recuperación de Ferrol Vello e outras entidades como o Concello de Ferrol.

Véxase tamén[editar | editar a fonte]