Eulogio Martínez

Eulogio Martínez
Información persoal
Nome	Eulogio Ramiro Martínez
Nacemento	11 de marzo de 1935
Lugar de nacemento	Asunción
Falecemento	30 de setembro de 1984
Lugar de falecemento	Barcelona
Altura	174 centímetros
Posición	dianteiro, dianteira
Carreira xuvenil
	Atlántida
Carreira sénior
Anos	Equipos	Aprs	(Gls)
1953–1956	Libertad
1956–1962	Barcelona	111	(61)
1962–1964	Elche	41	(7)
1964–1965	Atlético de Madrid	2	(0)
1965–1966	Europa	10	(3)
Selección nacional
1956	Cataluña	1	(0)
Na rede
Partidos e goles só en liga doméstica. [ editar datos en Wikidata ]

Eulogio Ramiro Martínez, nado en Asunción o 11 de marzo de 1935 e finado en Barcelona o 30 de setembro de 1984, foi un futbolista paraguaio, que xogaba como dianteiro. Cunha gran habilidade e instinto goleador, destacou no Club Libertad e no FC Barcelona, e foi internacional tanto coa selección paraguaia como coa española.

Traxectoria

Inicios en Paraguai

Comezou a súa carreira deportiva no Libertad, onde formou unha das mellores dianteiras da historia do club, xunto a Hermes González, Máximo Rolón e Rogelio Bedoya. Con ese equipo gañou o campionato paraguaio de 1955, no que marcou 10 goles. A superioridade daquel Libertad a nivel local tamén se trasladou ao plano internacional con vitorias contra equipos como o Partizan de Belgrado (4-3) e unha lembrada goleada por 5-1 sobre o River Plate, que contaba cun dos mellores equipos da súa historia, con xogadores como Santiago Vernazza, Amadeo Carrizo, Félix Lostau, Omar Sívori ou Walter Prado.

FC Barcelona

En 1956 fichou polo FC Barcelona, onde xogou durante as seguintes seis tempadas. Na primeira delas conseguiu 9 goles en liga, pero foi na Copa do Xeneralísimo onde explotou como goleador. No partido de volta dos oitavos de final marcoulle 7 goles ao Atlético de Madrid, nun partido que acabou 8-1. Na ida dos cuartos de final fíxolle 4 goles ao Real Madrid, mentres que nas semifinais marcou outros 4 contra a Real Sociedad. Rematou a Copa como campión e con 16 goles, o rexistro máis alto da historia do competición.

O 24 de setembro de 1957 marcou o primeiro gol da historia do Camp Nou. Foi o máximo goleador do equipo nas campañas 1956/57, 1957/58 e 1959/60, conseguindo 177 goles en 227 partidos. Gañou 6 títulos co club catalán: dúas ligas, dúas Copas do Xeneralísimo e dúas Copas de Feiras.

Outros equipos

Deixou o Barcelona en 1962, e posteriormente xogou dúas tempadas no Elche CF, unha no Atlético de Madrid e outra Europa, no que se retirou en 1965.

Seleccións nacionais

Formou parte das seleccións de Paraguai e España, xogando con elas 9 e 8 partidos respectivamente. Participou con Paraguai na Copa América de 1955 e con España no Mundial de Chile de 1962, disputando o primeiro partido fronte a Checoslovaquia.

Últimos anos e morte

Trala súa retirada instalouse en Calella, onde rexentou un bar e colaborou como adestrador no fútbol base da localidade. Sufriu problemas económicos e desgrazas familiares, entre eles a perda dunha filla. O 8 de de setembro de 1984 foi atropelado nunha autoestrada por un vehículo mentres cambiaba unha roda picada no seu. No accidente faleceu un amigo seu, mentres que Eulogio foi ingresado nun hospital durante semanas. Non puido superar as lesións e faleceu o 30 de setembro con só 49 anos.

Véxase tamén

Ligazóns externas

• Datos do xogador en BDFutbol (en castelán).
• Datos do xogador en fcbarcelonaonline.com (en castelán).