Teodorico o Grande

Teodorico o Grande

Nome orixinal	(got) 𐌸𐌹𐌿𐌳𐌰𐍂𐌴𐌹𐌺𐍃 𐍃𐌰 𐌼𐌹𐌺𐌹𐌻𐌰 (mis) Þiudareiks sa Mikila
Biografía
Nacemento	12 de maio de 454 (Gregoriano) Pannonia (Imperio Romano de Occidente)
Morte	30 de agosto de 526 (Gregoriano) (72 anos) Rávena (Reino ostrogodo)
Causa da morte	Morte natural
Lugar de sepultura	Mausoléu de Teodorico (pt)
Rexente Reino visigodo de Toledo, Imperio de Teodorico o Grande
511 – 30 de agosto de 526
Rei de Italia
15 de marzo de 493 – 30 de agosto de 526 ← Odoacro – Atalarico →
Rei dos ostrogodos
475 – 30 de agosto de 526 ← Teodomiro – Atalarico →
Magister militum
Patrician (en)
Cónsul romano
Datos persoais
País de nacionalidade	Reino ostrogodo
Grupo étnico	Ostrogodos
Relixión	Arianismo
Actividade
Lugar de traballo	Reino ostrogodo Italia
Ocupación	monarca , monarca
Período de tempo	Antigüidade tardía e Baixo Imperio Romano
Lingua	Lingua gótica e lingua latina
Participou en
476	deposición de Rómulo Augústulo
Outro
Título	Rei
Familia	Amalos
Cónxuxe	Audofleda
Fillos	Amalasunta, Teodegoda (pt) , Ostrogoda (pt)
Pais	Teodomiro   e Erelieva (pt)
Irmáns	Amalafrida

Teodorico o Grande, nado en Dacia no 454 e finado en Rávena no 526, foi un rei dos ostrogodos, cuxo reinado foi do 474 ao 526.

Traxectoria

Fillo do caudillo ostrogodo Teodomiro, da liñaxe dos Amalos, foi enviado polo seu pai como refén á cidade de Constantinopla (actual Istambul), sendo un neno (462). Alí recibiu unha educación baseada na cultura grecolatina. Sucedeu en 474 ao seu pai, como líder dos ostrogodos.

Reino de Teodorico o Grande

Foi nomeado patricio e magister militum polo augusto Zenón, emperador de Oriente. Este en 488 cedeulle o goberno de Italia coa condición de vencer a Odoacro, rei dos hérulos que depuxera a Rómulo Augústulo, último emperador romano de Occidente (476). Teodorico penetrou na Península Itálica á fronte do seu pobo, cuxo número se estima nunhas cen mil persoas. Conseguiu ocupar Rávena, onde finalmente morreu Odoacro (493).

Proclamouse rei de Italia (494) fixando a súa residencia en Rávena e foi recoñecido como rex Italiae polo augusto Anastasio, emperador de Oriente, en 497, a quen debía unha teórica submisión. Mantivo as diferenzas entre os ostrogodos, de relixión ariana, que retiveron o poder militar, e os romanos, católicos, que concentraron o poder civil, dentro dun difícil equilibrio.

O Mausoleo de Teodorico en Rávena.

Teodorico considerábase herdeiro do mundo romano e por iso respectou as institucións imperiais rodeándose de conselleiros latinos, como Boecio e Casiodoro. Desexaba crear un imperio xermánico de Occidente, herdeiro do romano, que englobase a francos, vándalos, visigodos e ostrogodos. Con este obxectivo, realizou unha hábil política de alianzas matrimoniais entre a súa familia e os reis dos outros pobos xermánicos, que, aínda que non chegaría a materializar o seu soño, converteuno no principal soberano occidental da súa época.

En 511 interveu de forma decisiva na resolución da crise da monarquía visigoda, aberta a raíz da morte de Alarico II na batalla de Vouillé (507), derrotado polos francos. Depuxo ao usurpador Xesaleico e coroou ao seu neto Amalarico, fillo de Alarico e da súa filla Teodogoda. Asumiu o goberno do reino visigodo como titor do seu neto, a quen colocou baixo a protección de Teudis, un dos seus xenerais. A rexencia mantívose ata a morte do monarca ostrogodo (526), cando Amalarico puido gobernar libremente ao seu pobo.

Favoreceu o desenvolvemento da agricultura e do comercio. Fixo de Rávena, a súa capital, un destacado centro artístico e cultural fomentando o cultivo das artes e as letras.

Permitiu a coexistencia do catolicismo e do arianismo durante a maior parte do seu reinado, pero esta tolerancia finalizou nos últimos anos da súa vida, debido aos enfrontamentos co Papado e co Imperio Bizantino, que o levaron a encerrar e decapitar ao seu conselleiro Boecio (524) e a encarcerar ao papa Xoán I.

Deixou como sucesor ao seu neto, fillo da súa filla Amalasunta, falecendo o 30 de agosto do 526. O estalido dunha guerra civil permitiu ao emperador Xustiniano converter Italia nunha nova provincia bizantina e dispersar aos ostrogodos, que desapareceron como pobo (555).

Véxase tamén

Bibliografía

• Martindale, J. R.; Jones, Arnold Hugh Martin; Morris, John (1980). The prosopography of the later Roman Empire - Volume 2. A. D. 395 - 527 (en inglés). Cambridge / Nova York: Cambridge University Press. 

Outros artigos

• Basílica de Santo Apolinario o Novo

Reino ostrogodo
Segue a: Teodomiro	Teodorico o Grande (488-526)	Precede a: Atalarico

Reino de Italia
Segue a: Odoacro	Teodorico o Grande (493-526)	Precede a: Atalarico

Reino visigodo
Segue a: Xesaleico	Teodorico o Grande (511-526)	Precede a: Amalarico