Río Prut

Río Prut
e
País	Ucraína, Moldavia, Romanía
Nacemento	Monte Howerla
Lonxitude	910 km
Conca	27.500 km²
Caudal medio	160 m³/s
Desembocadura	Río Danubio
Localización do curso do río Prut

O río Prut en Vorokhta, Ucraína

O Prut (en ucraíno: Прут) é un río da Europa orienta, tributario do Danubio. O seu curso esténdese por uns 910 km, que bañan a Ucraína, Moldavia e Romanía.

Percorrido

O Prut nace nos Cárpatos orientais, no monte Howerla, no suroeste da Ucraína, na rexión de Iwano Frankiwsk). Toma unha dirección cara sueste, e despois de 240 km en territorio ucraíno, pasa a formar a fronteira entre Moldavia e Romanía durante 711 km, para entrar por último neste último país e unirse ao Danubio, preto de Reni, ao leste da cidade de Galati (Romanía). O seu caudal medio é de 160 m³/s na xunta co Danubio.

Afluentes

Son numerosos, mais na súa maioría de moi curto percorrido. A salientar:

• Pola esquerda: Racovăţ, con 67 km de curso.
• Pola dereita: Volovăţ, de 43 km; Başeu, 118 km; Corogea, 32 km ; Jijia, sen dúbida o máis importante dos tributarios, cun curso de 275 km e unha bacía de 5.757 km² ; e o Elan, de 73 km.

A súa conca ocupa unha área de 27.500 km² (10.990 km² na Romanía)

Navegabilidade

O Prut é navegábel desde a cidade romanesa de Iaşi, nuns 300 km, até a desembocadura no Danubio.

Localidades ás beiras

Destacan Chernivtsi en Ucraína, Ungheni, en Moldavia e Iaşi na Romanía.

Historia

Na antigüidade era coñecido como río de Porata o de Pyretus, de onde deriva o seu nome actual. Antes da ocupación por parte soviética da rexión de Besarabia e máis da Bukovina setentrional, en 1940, o río descorría case enteiramente por territorio romanés.

Ten notoriedade histórica a Paz do Prut, que o tsar Pedro I o Grande se viu obrigado a asinar no 23 de xullo de 1711, logo de que as súas tropas se viron cercadas polos turcos na pequena cidade de Huşi.