Quibla

A parede da quibla, co mihrab e un minbar, na mesquita de Aqsunqur, O Cairo.

En árabe, a quibla ou o alquibla (a partir do árabe قبلة, al- qibla) designa de xeito xenérico unha dirección. Dende o punto de vista relixioso, indicaría a dirección precisa á que se teñen que orientar os fieis para realizar un acto concreto.

Na relixión islámica, é a orientación cara á Meca, precisa para realizar o precepto da oración e outros actos rituais (como a orientación das tumbas). En concreto, apúntase á Kaaba, sita na mesquita de al-Haram ou mesquita sagrada. Tense discutido sobre cal é o lugar especial da Kaaba, o punto exacto onde, en realidade, todo o mundo islámico se orienta, sen chegar a unha conclusión definitiva.

Esta práctica significa que tódalas mesquitas do mundo (agás a Mesquita de Córdoba e as influídas por esta) estean orientadas cara á Meca. Dentro de cada mesquita, a dirección exacta vén indicada polo mihrab, que está situado no muro da quibla.

Historia da quibla islámica

Inicialmente, Mahoma ordenara que, para o rezo, se adoptara a mesma dirección que os xudeus, en dirección a Xerusalén (esta orientación é coñecida coma quibla al-qadima القبلة القديمة = a antiga quibla), pero como durante a Héxira, os xudeus se negaran a aceptalo como profeta, decidiu cambiar a orientación pola da Kaaba na Meca. Na sura II, no versículo 144 do Corán indícase "Faremos que te vires cara unha dirección que te satisfaga. Vira o teu rostro cara á Mesquita Sagrada. Onde queira que esteas, vira o teu rostro cara a ela...".

Cálculo da quibla no islam

Quibla.

A determinación da quibla realízase, hoxe en día, mediante unha serie de táboas. Na antigüidade, existían diversos astrónomos árabes especializados no trazado da quibla nos cuadrantes, como Abū Ḥanīfa Dīnawarī (de Dinawar 895), que escribiu un libro sobre o tema. No obstante, existen outros autores monográficos como Ahmed el-Leit coñecido como Rahib al-Qibla, é dicir, o mestre da quibla, procedente de Córdoba, en 907.

Determinación exacta

Sendo as coordenadas xeográficas do lugar de rezo φ₁, λ₁ e sendo as coordenadas da Kaaba φ₂, λ₂, a seguinte expresión trigonométrica calcula o acimut da quibla desde o lugar de rezo até a Kaaba:

$\alpha _{Q}=\arctan \left[{\frac {\sin \left(\lambda _{2}-\lambda _{1}\right)}{\sin \left(90^{\circ }-\varphi _{1}\right)\cdot \operatorname {cotan} \left(90^{\circ }-\varphi _{2}\right)-\cos \left(90^{\circ }-\varphi _{1}\right)\cdot \cos \left(\lambda _{2}-\lambda _{1}\right)}}\right]$

As coordenadas da Meca aplicables a esta fórmula son latitude φ₂ = 21,4225° N, e lonxitude λ₂ = 39,8261° E. Nalgúns casos, o resultado entregado pola fórmula será un ángulo complementario ou outro suplementario e non o valor real.

A quibla na relixión bahaí

A quibla dos bahaíes é santuario de Bahá'u'lláh na cidade de Acre (Israel), onde se atopa o sepulcro do fundador da súa relixión.

Véxase tamén

Bibliografía

• Bierman, Irene A. (1998). Writing Signs: Fatimid Public Text (en inglés). Oakland, CA: University of California Press. ISBN 9780520208025. 
• Rius, Mónica (1999). "Orientación de las mezquitas en Toledo". Tulaytula. Revista de la Asociación de Amigos del Toledo Islámico (4): 67–75. ISSN 1575-653X. 
• Smith, Peter (2000). A Concise Encyclopaedia of the Bahá'í Faith. Serie: Concise Encyclopedias (en inglés). Oxford: Oneworld Publications. ISBN 978-1851681846. 

Ligazóns externas

• Locator da quibla (en inglés)
• Cálculo da quibla e a Declinación Magnética Arquivado 25 de novembro de 2016 en Wayback Machine. (inglés-francés)
• Denis Roegel: "An Extension of Al-Khalīlī's Qibla Table to the Entire World", 2008