Francisco de Aguiar Seijas e Ulloa

Na Galipedia, a Wikipedia en galego.
Francisco de Aguiar Seijas e Ulloa
Nome completoFrancisco de Aguiar y Seijas
Nacemento1632
Lugar de nacementoBetanzos
Falecemento14 de agosto de 1698
Lugar de falecementoCidade de México
NacionalidadeEspaña
RelixiónIgrexa católica
Alma máterUniversidade de Salamanca
OcupaciónRelixioso
editar datos en Wikidata ]

Francisco de Aguiar Seixas e Ulloa, nado en Betanzos en 1632 e finado en Cidade de México o 14 de agosto de 1698, foi un relixioso católico galego, bispo de Michoacán e arcebispo de Nueva España.

Biografía[editar | editar a fonte]

Placa na Igrexa de Santiago en Betanzos

Foi fillo de Alonso Vázquez de Seixas e Lobeira, rexedor perpetuo de Betanzos, e de Mariana de Ulloa. Estudou nas universidades de Santiago de Compostela e de Salamanca, chegando a ser reitor da primeira entre 1668 e 1674.

O 20 de agosto de 1677 foi nomeado bispo de Michoacán (actual arquidiocese de Morelia), polo que embarcou cara a América ao ano seguinte. Permaneceu tres anos no cargo, ao ser nomeado arcebispo de Nueva España (actual Arquidiocese de México) por Inocencio XI en 1680. Ocupou a cátedra o 2 de xaneiro de 1682, sendo unha das súas primeiras medidas a fundación e construción do Seminario Conciliar de México. Tamén mandou construír diversas obras adicadas á beneficencia, coma un hospital para enfermas mentais, o colexio de San Miguel de Belén e a Casa de Misericordia. En 1695 acometeu o derrubamento e o inicio das obras do Santuario da Nosa Señora de Guadalupe, rematado en 1709.

Ascético e moralista, da súa labor coma arcebispo destacan a prohibición das pelexas de galos, das touradas e das representacións teatrais. Ademais, durante o seu episcopado tivo fortes conflitos coa poetisa e dramaturga Sor Juana Inés de la Cruz: en plena Inquisición española, o prelado vía incompatible a súa condición de relixiosa co carácter profano de gran parte da súa obra.

Trala súa morte foi soterrado na capela de San Filipe da catedral mexicana.


Predecesor:
Francisco Verdín y Molina
 Bispo de Michoacán 
1677 - 1680
Sucesor:
Antonio de Monroy
Predecesor:
Payo Enríquez de Rivera Manrique
 Arcebispo de México 
1680 - 1698
Sucesor:
Juan de Ortega Cano Montáñez y Patiño

Véxase tamén[editar | editar a fonte]

Bibliografía[editar | editar a fonte]