Estrella Galicia

Na Galipedia, a Wikipedia en galego.
Estrella Galicia

Fábrica de Estrella Galicia na Grela, A Coruña.
TipoSociedade anónima unipersoal
Fundación1906
MatrizHijos de Rivera S.A.
LocalizaciónPolígono da Grela 15008 A Coruña Galicia Galicia
Persoas claveIgnacio Rivera Quintana (presidente executivo actual)
IndustriaAlimentación cervexa
ProdutosEstrella Galicia; 1906; HR; River; River Zero; auga de Cabreiroá; sidra Manzanova
Beneficio329.453.019 euros (en 2015 en todo o grupo)[1]
Número de empregados877 (2014, en todo o grupo)[2]
Na rede
http://www.estrellagalicia.es/
Facebook: 100064504851816 Twitter: Estrellagalicia Instagram: estrellagalicia Youtube: UCHlL0UhfiIqvZujeslApnAQ Editar o valor em Wikidata
editar datos en Wikidata ]

Estrella Galicia é unha marca de cervexa fabricada pola empresa galega Hijos de Rivera S.A. con sede no Polígono de Agrela na Coruña. É unha cervexa loura que posúe unha gradación alcohólica de 6,5 graos e un característico sabor amargo lembranza do lúpulo empregado na súa orixe e que se cultivaba en Betanzos.

Historia[editar | editar a fonte]

Despois do seu regreso de México a finais do século XIX, José Rivera Corral fundou en 1906 a fábrica de La Estrella de Galicia na zona coruñesa de Catro Camiños, dedicada á fabricación de cervexas e xeo. O nome facía referencia ao que fora o seu negocio en Veracruz, La Estrella de Oro, que apostaba por un produto naqueles tempos de consumo moi reducido.

En 1920, Ramón Rivera Illade converteuse nun dos primeiros Mestres Cervexeiros de España. Un ano despois a produción pasou de 1751 hl/ano a máis de 7 000 grazas aos coñecementos técnicos de Ramón Rivera, que modernizou a fábrica e ampliou a catro a gama de receitas: Pilsen, Múnic, Bock e Dobre Bock. En 1925, inaugurouse o primeiro merendeiro ao aire libre, orixe da actual cervexaría de Catro Camiños.

Antigo camión de repartimento de Estrella Galicia na Coruña.

En 1941, debido á situación económica tras a fin da guerra civil española e o inicio da Segunda guerra mundial que causaron un desabastecemento de auga e cebada, La Estrella de Galicia detivo a súa produción por única vez na súa historia, se ben mantivo todos os empregos. En 1949 a terceira xeración da familia Rivera entrou na dirección da compañía. En 1962 levouse a cabo a gran remodelación da fábrica de Catro Camiños, que se mantivo ata que en 1969 comezou a construción dunha nova fábrica en Agrela, que supuxo un grande avance en tamaño e tecnoloxía.

En 1971 a marca comercial La Estrella de Galicia cambiou o seu nome á forma abreviada Estrella Galicia, e introduciu o lema Elaborado por Hijos de Rivera. Co traslado en 1972 á nova fábrica comezouse a producir un novo tipo de cervexa, a Especial Rivera, que se converteu no produto máis emblemático da marca. En 1979 apareceu o primeiro envasado en lata.

En 1982, presentouse a cervexa Extra La Colorada e a primeira Estrella de Navidad. En 1985 emitiuse o primeiro anuncio televisivo de Estrella de Galicia na Televisión de Galicia. En 1988 produciron a primeira cervexa sen alcohol, a Estrella Galicia Sin. En 1993, conmemorando o ano de fundación da empresa, presentouse a cervexa 1906 Reserva Especial.

En 1999, Jose María Rivera Trallero pertencente á cuarta xeración da familia Rivera, foi elixido Director Xeral. Ese mesmo ano naceu a cervexa sen pasteurizar Estrella Galicia Cerveza de Bodega, que se serve por primeira vez na cervexaría de Catro Camiños.

En 2004, Hijos de Rivera puxo en marcha o proxecto de recuperación do lúpulo en Galicia, como tributo a José María Rivera Corral, pioneiro do cultivo do lúpulo en España. En 2007 José María Rivera Trallero foi nomeado conselleiro delegado e Ignacio Rivera Quintana converteuse no novo director xeral de Hijos de Rivera.

En 2011, creouse a corporación Hijos de Rivera, presidida por Santiago Ojea, e baseada en dous alicerces: Hijos de Rivera, S.A.U. e HR Inversiones Corporativas. Nese mesmo ano lanzouse a primeira campaña nacional e presentouse a Estrella Galicia 0´0.

En 2012, Ignacio Rivera Quintana foi nomeado Conselleiro Delegado. Comezou unha expansión nacional e no ámbito internacional os produtos chegaban xa a máis de 30 países de todo o mundo. Tamén neste ano tivo lugar a incorporación do primeiro membro da quinta xeración da familia Rivera.

En 2013, recuperouse a receita de La Colorada, 1906 Red Vintage, e comezou a funcionar a nova planta de cocemento da fábrica de Agrela, que permitiu duplicar a produción. En 2014 presentaron a súa primeira cervexa negra, no 2015 a primeira cervexa sen glute, no 2016 recuperaron a receita orixinal para conmemorar o seu 110 aniversario, e no 2017 presentaron a súa primeira cervexa elaborada con pementos de Padrón.

En 2017, a produción de Estrella Galicia acadou os 278 millóns de litros.

Tipos de cervexa[editar | editar a fonte]

Camión de Estrella Galicia.
  • Estrella Galicia: A Estrella Galicia Especial é unha cervexa de cor dourada brillante que parte dunha selección de maltes e lúpulo especialmente amargos e o seu proceso de cocción, fermentación e maduración transcorre ao longo de 20 días, iso fai que esta cervexa teña un característico sabor lupulado. Ten unha gradación alcohólica de 5,5 graos.
  • Estrella Galicia Light: É unha cervexa con menos calorías (un 35% menos) e con menos gradación alcohólica que a Estrella Galicia Especial, contando con 2,5 graos fronte aos 5,5 da Estrella Galicia Especial.
  • 1906: Cervexa reserva especial, cun sabor máis intenso que as outras variedades. Ten unha gradación alcohólica de 6,5 graos. O seu nome é unha homenaxe ao ano de fundación da empresa.
  • Estrella Galicia 0,0: Esta cervexa está elaborada mediante un proceso de fermentación interrompida, trátase dunha cervexa sen alcohol que reflicte a cor típica das cervexas tipo Pilsen. É unha cervexa de sabor doce. Esta cervexa pasou a substituír as anteriores River Sin e River 0,0.
  • Shandy Estrella Galicia: É unha cervexa lager aromatizada cun toque de limón entre ácido e doce. Ten cun contido alcohólico inferior ao 1% en volume.
  • Estrella Galicia Pilsen: É unha cervexa de tipo Pilsen, máis suave e de corpo máis lixeiro que Estrella Galicia Especial, aínda que mantén o seu sabor amargo tradicional. Ten unha gradación alcohólica de 4,7 graos. Esta cervexa pasou a substituír a antiga pilsen da cervexeira coruñesa, a HR.

Cervexas especiais e edicións especiais[editar | editar a fonte]

  • Estrella Galicia Xacobeo: Foi unha edición especial lanzada por Estrella Galicia en maio de 2010 co gallo do Ano Xacobeo. Esta edición especial foi presentada durante a feira de alimentación Alimentaria 2010.
  • Estrella de Navidad: É unha edición especial de Estrella Galicia lanzada cada ano polas festa do Nadal. Está elaborada con 100% malte e lúpulo cultivado en Galiza, en Mabegondo [3]
  • Estrella Galicia Artesana: Cervexa especial lanzada por Estrella Galicia en maio do 2011. Trátase dunha cervexa de autor asinada polo prestixioso cociñeiro galego Pepe Solla. É unha cervexa con intenso aroma a cereal e lixeiros toques de mel e ten unha gradación alcohólica de 4,2 graos.
  • Estrella Galicia San Froilán: Edición especial da Estrella Galicia Especial para a Festa de San Froilán de Lugo.
  • Estrella Galicia Siempre Dépor: Edición especial da Estrella Galicia Especial de apoio ao Deportivo da Coruña con etiquetas co escudo e as cores do equipo coruñés.

Estrella Galicia no deporte[editar | editar a fonte]

Estrella Galicia ten unha grade aposta co patrocinio deportivo como un xeito de conectarse co seu público. Intentan comezar cos atletas desde cero, desde a base, o que non significa que algúns se convertan en campións do mundo como Marc Márquez ou estean na elite do seu deporte como Carlos Sainz. Prestan un especial atención ao deporte galego: no fútbol (Deportivo, Celta e Lugo), baloncesto (Obradoiro CAB) ou hockey (Club Liceo).

Constitúe case o 50% do investimento en mercadotecnia. Un dos territorios nos que a marca está máis presente é o motor, tanto na Fórmula 1 (Renault e Carlos Sainz) como en MotoGP (Estrella Galicia 0,0 Marc VDS ou Marc Márquez), así como noutras disciplinas. Xa que os deportes de motor teñen moitos valores cos que se identifican, o esforzo, o traballo en equipo, o mundo sen alcohol, ou o desenvolvemento do talento desde cedo.

Mercadotecnia[editar | editar a fonte]

O patrocinio do produto a través de series de televisión como pode ser a serie La que se avecina ou La casa de papel da produtora Netflix fixo que Estrella Galicia fixese un crecemento directo fronte a outras cervexas. Na década 2010-2020 tivo campañas a nivel estatal como "a túa vida en cifras" ou "Únete á resistencia".

Notas[editar | editar a fonte]

Véxase tamén[editar | editar a fonte]

Outros artigos[editar | editar a fonte]

Ligazóns externas[editar | editar a fonte]