Santalla de Rei, A Pobra do Brollón

Santalla de Rei
Concello	A Pobra do Brollón
Coordenadas	42°35′26″N 7°25′06″O
Área	1,75 km²
Poboación	42 hab.
Densidade	24 hab./km²
Entidades de poboación	A Ribeira e O Reguengo
[ editar datos en Wikidata ]

[[Categoría:A Pobra do Brollón poboación {{{ano}}}]]

Para o arciprestado homónimo, véxase: Santalla de Rei (arciprestado).

Para outras páxinas con títulos homónimos véxase: Santalla.

Santalla de Rei é unha parroquia pertencente ó concello da Pobra do Brollón na provincia de Lugo. Pertence ó arciprestado homónimo, sendo a súa sede.

Está delimitada pola parroquia de Veiga (anexa á de Santalla) ó norte, Ferreiros e Castrosante polo sur, Castrosante polo leste e, Piño e Eixón polo oeste.

Santalla encóntrase situada a uns 62 km da capital provincial, Lugo, e a 6 km da Pobra do Brollón, capital do concello do mesmo nome.

Está bañada polo río Cabe que nace no concello veciño do Incio e é afluente do río Sil.

Poboación no 2007: 42 habitantes segundo o IGE

Medio Natural

Xeografía

Ficheiro:Igrexa Santalla2.jpg

Campanario da Igrexa de Santalla de Rei

Santalla de Rei sitúase nun pequeno val polo que transcurre o río Cabe, na metade norte do concello da Pobra do Brollón, entre as parroquias de Piño, Veiga, Eixón, Castrosante e Ferreiros. Ten unha altura considerablemente máis baixa que as outras parroquias, excepto as terras bañadas polo río Cabe e para acceder ás outras aldeas hai que subir notables costas. A súa altitude é de 372 m sobre o nivel do mar.

Hidrografía

O único río que transcurre pola parroquia é o Cabe que divide o pobo en dúas metades. A maioría da aldea sitúase na cara oeste aínda que quedan algunhas casas na outra ribeira. Pertence á rede hidrográfica Miño-Sil e é tamén o principal río do concello. Os regadíos e parte da auga corrente depende do Cabe. Consérvase o Muíño de Folla, que nos seus tempos era ou único que funcionaba na parroquia, pero que actualmente convertéuse en propiedade privada.

Climatoloxía

O clima de Santalla de Rei é oceánico cunha gran influencia do clima continental. Os veráns son calorosos e secos cunha temperatura media de 20,3ºC e os invernos son fríos e moi húmidos cunha temperatura media de 6,2ºC.

No verán as temperaturas superan de día fácilmente os 30ºC e, algunhs días de intenso calor, se teñen rozado e incluso superado lixeramente os 40ºC. No inverno as noites son moi frías e poden rexistrarse valores baixo cero, sendo habituais as xeadas.

Son habituais as néboas que moitos días non deixan ve-lo sol pero a probabilidade de neve é moi baixa debido á pouca altitude que ten a parroquia, aínda que non son poucas as veces que nevou. A primavera e o outono son as estacións máis agradables.

As oscilacións térmicas son bastante grandes debido á súa situación e as precipitacións son bastante regulares aínda que no verán chove pouco.

Demografía

En agosto de 2007, a parroquia contaba con 42 habitantes agrupados nas entidades do Reguengo e A Ribeira sendo a densidade media por entidade, para o mesmo ano, de 27,86 hab/km².

Coma na maioría das aldeas galegas, principalmente as do interior rural, a súa poboación está minguando. Nos últimos anos (1991-2007) a poboación diminuíu en 18 habitantes, principalmente, a causa da alta taxa de mortalidade e do progresivo envellecemento da poboación. Todo e así, Santalla é a terceira parroquia do concello que menos habitantes perdeu neste período, afirmación evidente tendo en conta que a media de habitantes perdidos por parroquia no concello durante este período sitúase en 48.

Poboación nas entidades

Entidade de poboación	Habitantes (2007)	Homes	Mulleres
A Ribeira	19	10	9
O Reguengo	24	13	10
TOTAL	42	23	19

Historia

Figura en documentos antigos como Santalla de Mouro Queimado, ou Santalla do Rei Queimado que din algunhas lendas e tamén os veciños da zona. O último nome dálle a Santalla o apelido "de Rei".

Santalla de Rei foi durante moitos séculos, e aínda é, o arciprestado dunha chea de aldeas e parroquias pertencentes ós concellos de Bóveda e A Pobra do Brollón.

Véxase Santalla de Rei (arciprestado)

Patrimonio artístico

• Igrexa de Santalla ou Santa Alla, patroa de Santalla de Rei, do século XVII. Está situada no centro da Ribeira e ten ó seu redor o cemiterio parroquial. Está formada por unha nave principal rectangular con tellado de lousa a dúas augas e campanario con cataventos e dúas campás. A sancristía está adosada ó presbiterio. No seu interior posúe un retablo tricentenario do 1697 con diversas imaxes, entre elas unha imaxe da Santa Lucía, da mesma época que o retablo. Nos laterais do retablo encontramos imaxes de San Antón e Santiago Apóstolo. Nos laterais da igrexa encontramos dous pequenos retablos centenarios coas imaxes da Santa Lucía e da Virxe do Rosario. No ano 2003, a igrexa foi restaurada interior e exteriormente sen modificar a súa estrutura orixinal.

• Muiño de Folla, situado na ribeira dereita do río Cabe, no Reguengo, agora en desuso, propiedade privada.

Comunicacións

Santalla está comunicada co resto do municipio mediante varias vías de comunicación. A única estrada que pasa pola parroquia é a LU-4703 que comunica con Piño, A Pobra do Brollón, Veiga e coas estradas LU-652 (Bóveda-A Estación e LU-653 (A Pobra do Brollón-O Incio). Nesta estrada hai desvíos a Pacios de Veiga, Eixón e A Ferreirúa de Abaixo.

Hai tamén unha pista asfaltada que empeza na parroquia e acaba na LU-653 en Pacios de Veiga, pasando por Cortiñas e A Ponte de Veiga.

Finalmente hai varias corredoiras e carreiros que levan a varios prados e campos, e a Eixón e Castrosante.

Festividades

Festas da Santa Lucía

As festas parroquiais celébranse, cunha tradicional romaría, o penúltimo sábado de agosto na honra a Santa Lucía. As festas empezan o vernes pola tarde e rematan o domingo.

A festa celebrábase antigamente o 26 de setembro e seguía o 27. Era costume que veciños doutras aldeas da zona fosen comer ó campo da festa de merenda. Tamén era tradicional unha actuación de titores chamados Os Barrigaverdes. Nos anos 70 cambiouse a agosto porque normalmente chovía e foi cando houbo actuacións de cantantes moi coñecidos como Ana Kiro ou Karina. A festa da Santa Lucía era unha das festas de máis sona de todo o sur lucense.

Actualmente hai, durante a véspera (penúltimo venres de agosto), unha merenda con empanada e queimada seguida dunha festa e verbena ata altas horas da madrugada. A festa continua o sábado con pasarrúas a cargo de gaiteiros da zona e posteriormente a romaría da Santa Lucía con procisión ata o campo da festa e a posterior misa campestre, na que os devotos lle pasan panos á Virxe polos ollos para que lles conserve a vista. Logo hai festa de tarde e noite e verbena. A festa continua o domingo co seu derradeiro día cunha procesión, unha misa solemne e, ás veces, festa de tarde e noite.

Como dato anecdótico, no ano 2007 a festa do sábado pola noite foi amenizada por un grupo de presos da cárcere de Teixeiro, chamada Orquesta Gran Paradela

Galería de imaxes

• 
  Fachada da igrexa de Santalla de Rei
• 
  Vista da parroquia dende o cimo da costa

Lugares da parroquia de Santalla de Rei

Lugares da parroquia de Santalla de Rei no concello da Pobra do Brollón (provincia de Lugo)
O Reguengo | A Ribeira

Véxase tamén

• Páxina de Santalla de Rei
• Fotos de Santalla de Rei
• Arciprestado de Santalla de Rei
• Comarca da Terra de Lemos
• A Pobra do Brollón
• Río Cabe