Cornes, Conxo, Santiago de Compostela

Cornes era un lugar do concello de Conxo, situado ao suroeste de Santiago de Compostela e dende 1925 integrado neste. Cornes xa non existe como núcleo, e está integrado dentro da cidade compostelá.

Historia

A orixe do nome Cornes podería ser unha voz prerromana que aludiría a un rochedo ao que se abeira. Nada queda xa do trazado antigo do lugar de Cornes, nunha área completamente reurbanizada dende mediados do século XX. Pero en Cornes atopábase a antiga casa do concello de Conxo (actual avenida de Vilagarcía, 28), e en Cornes naceu Rosalía de Castro, nunha casa do daquela chamado Camiño Novo (na actualidade Praza de Vigo).

De Cornes saíu a primeira liña de camiño de ferro de Galiza, que remataba no Carril. Ao redor da estación levantáronse almacéns de aceite, viño, carbón, froita, sal, madeira, cemento, etc. Nos Campos de San Xosé, actualmente rúa de Frei Rosendo Salvado e avenida de Vilagarcía, establecéronse artesáns e obreiros principalmente marmoristas, carpinteiros e tallistas. Había tamén unha canteira de pedra, unha imprenta e un taller de coches.

Cultura

Cornes aparece nomeado en dous poemas de Rosalía de Castro: Aos lirios de Cornes e Ao lavadeiro de Cornes. ^{[Cómpre referencia]}