Anisia Miranda

Anisia Miranda

Biografía
Nacemento	30 de decembro de 1932 Provincia de Ciego de Ávila, Cuba
Morte	22 de outubro de 2009 (76 anos) Gres, España
Datos persoais
País de nacionalidade	Cuba España
Actividade
Ocupación	woman author (en)
Lingua	Lingua castelá e lingua galega
Familia
Cónxuxe	Xosé Neira Vilas

Anisia Miranda Fernández, nada en Ciego de Ávila (Cuba) o 30 de decembro de 1932 e finada en Gres, Vila de Cruces, o 22 de outubro de 2009, foi unha escritora cubano-galega en lingua galega e lingua castelá, filla adoptiva do Concello de Vila de Cruces.

Traxectoria

Foi filla de Faustino Miranda, de Verea, e Teresa Fernández, de Celanova, que emigraron a Cuba en 1927. Anisia estudou Maxisterio e Xornalismo na Habana. En 1953 a familia colleu un barco que cruzou o canal de Panamá e chegou ao porto chileno de Valparaíso; desde alí, cruzaron os Andes en tren ata chegar a Buenos Aires, onde Anisia rematou Xornalismo.

Nunha conferencia impartida por Ramón Suárez Picallo sobre Rosalía de Castro coñeceu o escritor galego Xosé Neira Vilas, co que casou o 21 de febreiro de 1957, ano no que xuntos fundaron a editorial e distribuidora de libros en galego Follas Novas. Na Arxentina comezou un importante vínculo coa cultura galega, recibindo clases de galegos no exilio como Eduardo Blanco Amor, Alberto Vilanova, Rafael Dieste, Antón Baltar ou Ramón de Valenzuela. Así mesmo, nesa época comezou a verter os primeiros textos de poetas americanos ao galego.

En xuño de 1961 regresou a Cuba, onde colaborou con Alejo Carpentier na revista Pueblo y Cultura e conduciu un programa de radio, sen deixar de escribir, sobre todo no ámbito da literatura infantil e xuvenil. Foi cofundadora de dúas revistas cubanas dirixidas ao público infantil: Zunzún e Bijirita.

En 1972 viaxou por vez primeira a Galicia, con Neira Vilas, á beira de dous meses. Tras doce viaxes máis de ida e volta, o matrimonio, xa xubilado, regresou definitivamente a Galicia en 1992, para viviren en Gres. Desde 1992 vicepresidiu a Fundación Xosé Neira Vilas.

Obra

En castelán

• Esta es Cuba, hermano. Bos Aires: Editorial Follas Novas, 1960
• La primeira aventura.
• Los cuentos del Compay Grillo, 1965.
• Mitos y leyendas de la antigua Grecia, 1966.
• Vietnam y tú, 1970.
• Las vacaciones de Lidia, 1984.
• La casa de los títeres, 1986.
• La casa nueva de mis abuelos.
• Treinta días en Vietnam.

Otero Pedrayo e os membros das Mocidades Galeguistas de Buenos Aires en 1959. Anisia Miranda aparece no centro da fotografía.

En galego

Literatura infanto-xuvenil

• Pardela amiga.
• Os contos do Compay Grilo.
• A primeira aventura.
• A casa dos títeres.
• A volta do Compay Grilo.
• Mitos e lendas da vella Grecia, 1983, Edicións do Castro.
• A cama, a bolboreta e o paxariño. A Coruña: Ediciós do Castro, 1998.

Con Xosé Neira Vilas

• Cantarolas e contos prá xente miúda. Akal, 1975.
• Cantarolas. Xerais, 1995.

Colectivas

• E dixo o corvo..., 1997, Xunta de Galicia.
• 16 poemas galegos para Ernesto Che Guevara contra a súa morte (1967-1973), 1997, Universidade de Santiago de Compostela.
• Homenaxe poética ao trobador Xohan de Requeixo, 2003.

Véxase tamén

Bibliografía

• Blanco García, Carmen (1988). "Literatura infantil e xuvenil" (PDF). Festa da Palabra Silenciada (FIGA) (5): 5–24. ISSN 1139-4854. 
• García Gómez, Valentín (coord.) (2010). Homenaxe a Anisia Miranda (PDF). Xunta de Galicia. ISBN 978-84-453-4868-0. 
• Marco, Aurora (2007). Dicionario de Mulleres Galegas. Edicións A Nosa Terra. ISBN 978-84-8341-146-9. 
• Piñeiro Feióo, Antonio (novembro de 2011). "Pepe Velo e Anisia Miranda. Dúas historias (apócrifas) cruzadas nunha fotografía". Raigame (35): 50–57. ISSN 1136-3207. Consultado o 14 de decembro de 2017. 

Ligazóns externas

• Biografía de Anisia Miranda Fundación Xosé Neira Vilas.
• Armas García, Celia (2010) "Anisia Miranda. Polífacética promotora da cultura galega dentro e fora de Galicia" Álbum de Mulleres, CCG.
• Ficha de Anisia Miranda en Galegos.info
• Anisia Miranda na Biblioteca Virtual Galega