Bufo nival

Bufo nival
Estado de conservación
Pouco preocupante
Clasificación científica
Reino: Animalia Filo: Chordata Clase: Aves Orde: Strigiformes Familia: Strigidae Xénero: Bubo Especie: B. scandiacus
Nome binomial
'Bubo scandiacus' (Linnaeus, 1758)
Sinonimia
Strix scandiaca Linnaeus, 1758 Nyctea scandiaca Stephens, 1826

O bufo nival (Bubo scandiacus) é unha especie da familia das estríxidas. Nos Estados Unidos é tamén coñecida coma bufo do ártico ou gran bufo branco.

Morfoloxía

Bufo de gran tamaño, cabeza redonda e orellas case invisíbeis. A plumaxe é branca con pintas negras na cabeza, dorso e cola. En ocasións hai individuos totalmente brancos. O peteiro negro e o iris amarelo contrastan fortemente coa plumaxe. Actividade crepuscular e tamén diúrna. Adoita medir entre 53 a 65 cm de longo e uns 120 a 150 cm de envergadura. A femia posúe unhas raias de cor marrón.

Reprodución

Pon entre 4 e 10 ovos en maio, nun niño colocado nalgún lugar seco e con boa visibilidade. É unha especie monógama. Os xuvenís son de cor acastañada e con bandas de cor branca.

Nutrición

A súa base alimentaria son os lemmings, mais tamén captura lebres e aves. En épocas de escaseza, aliméntase das reservas que vai acumulando ó longo de todo o ano. Isto permítelle sobrevivir en ambientes moi inhóspitos.

Distribución

Presente no norte e interior de Escandinavia. Tamén en Islandia e as costas árticas de América e Siberia. Soen facer migración cara a zonas máis meridionais coa chegada do outono. Excepcionalmente poden chegar ata Holanda ou Alemaña central.

Cultura popular

Hedwig, a curuxa de Harry Potter é un bufo nival. Aínda que os libros a identifican coma femia, para gravar os filmes empregaron machos, por ser dunha cor branca máis brillante.

Bibliografía

• Nicolai, Jürgen (1995). Everest, ed. Aves rapaces diurnas y nocturnas : identificar, clasificar y proteger las aves rapaces de Europa. Madrid. p. 157.  (en castelán)