Eduardo Vincenti

Eduardo Vincenti

Biografía
Nacemento	13 de outubro de 1855 A Coruña, España
Morte	4 de abril de 1924 (68 anos) Madrid, España
Lugar de sepultura	Cemiterio de Santo Amaro de Pontevedra
Alcalde de Madrid
28 de xuño de 1905 – 15 de xuño de 1906 ← Gonzalo Figueroa y Torres – Alberto Aguilera →
Alcalde de Madrid
19 de xuño de 1903 – 2 de novembro de 1913 ← Joaquín Ruíz Giménez – Luis Marichalar y Monreal (pt)  →
Deputado das Cortes
1886 – 1889
Concelleiro de Madrid
Datos persoais
País de nacionalidade	España
Educación	Universidade de Santiago de Compostela
Actividade
Lugar de traballo	Madrid
Ocupación	xornalista , político , telegrafista (pt)
Partido político	Partido Liberal Fusionista
Membro de	Real Academia Galega
Lingua	Lingua castelá
Familia
Parentes	Eugenio Montero Ríos (sogro) Manuel García Prieto (concunhado (pt) ) Benito Calderón Ozores (concunhado (pt) )

Eduardo Vincenti Reguera, nado na Coruña o 13 de outubro de 1857 e finado en Madrid o 4 de abril de 1924, foi un político galego.

Biografía

Realizou os estudos de dereito na Universidade de Santiago de Compostela. Deuse a coñecer no periódico El Eco de Tambo e desenvolveu unha notable carreira política: militando no Partido Liberal, foi deputado por Pontevedra desde 1886 ata o seu falecemento (renovou a súa acta de deputado en quince ocasións), director xeral de Administración e Fomento do Ministerio do Interior, Director Xeral de Ensino Primario, concelleiro e alcalde de Madrid (1905-06), presidente do Consello de Instrución Pública, e vicepresidente primeiro do Consello de Ministros. En 1897 dirixiu en Madrid o Boletín de la Liga Protectora de la Educación Nacional. Colaborou na revista órgano de La Unión Ibero-Americana (1904) e en La Revista Popular (1904).

Estatua en Pontevedra.

Estivo casado con Dolores Montero Villegas, filla de Eugenio Montero Ríos, de quen foi aliado político.

Como deputado por Pontevedra ocupouse a miúdo, tanto de asuntos relacionados co ensino público e co profesorado, como do desenvolvemento da agricultura e das cuestións sociais, chamando a atención sobre a necesidade de transformar a propiedade da terra rexida polo sistema foral en propiedade libre. Presentou e defendeu en 1907 unha proposición de lei sobre foros e subforos.

Sepulcro no cemiterio de San Amaro de Pontevedra.

Tamén tivo unha grande preocupación polo desenvolvemento da educación, como puxo de manifesto nas súas intervencións parlamentarias que reuniu nun texto editado en 1916, nas intervencións realizadas desde a presidencia de diversas Asembleas nacionais e rexionais e congresos de interese pedagóxico. Foi Presidente da Liga de los Amigos de la Enseñanza e dirixiu o Boletín de la Liga Protectora de la Educación Nacional a comezos do século XX, con marcados acenos rexeneracionistas; era un dos vocais da Junta para Ampliación de Estudios e Investigaciones Científicas.

A súa defensa constante da necesidade de melloras corporativas e profesionais para o Maxisterio deulle credibilidade entre este sector profesional, que o honrou dedicándolle un busto e un singular pedestal nos xardíns da Alameda de Pontevedra.

Obras

• Estudios sobre las reformas penitenciarias (1880).
• Reformas más convenientes para el mejoramiento de la clase obrera (1884).
• La propiedad foral en Galicia (1888).
• La libertad de prensa (1902).
• Estudios sobre emigración (1908).
• La educación popular: memoria (1911).
• Política pedagógica. Treinta años de vida parlamentaria y extraparlamentaria (1916).
• El problema agrario en Galicia. Redención de censos y foros. Acción parlamentaria (1917).

Véxase tamén

Ligazóns externas

• "Eduardo Vincenti". Álbum da JAE do Consello da Cultura Galega.