Europa Oriental

Mapa da Europa Oriental estendida, incluíndo as repúblicas ex-soviéticas incorporadas á UE, tamén as bálticas.

As conferencias de Ialta (4 de febreiro - 11 de febreiro de 1945) e de Potsdam (17 de xullo - 2 de agosto de 1945), dividiron Europa en dúas grandes áreas políticas. Nos países da Europa Oriental impuxéronse no goberno os partidos comunistas coa axuda, ás veces, do Exército Vermello.

Estes países, afíns ideoloxicamente, organizáronse no:

• COMECON (Consello de Axuda Mutua Económica), creado en 1949 como resposta ó Plan Marshall (programa de créditos brandos dos EUA ós países de Europa Occidental).
• Pacto de Varsovia, alianza militar constituída en 1955 como resposta á Alianza Atllántica ou OTAN.

Na actualidade desapareceron tanto o COMECON como o Pacto de Varsovia. Os países de Europa Oriental estánse a integrar na Unión Europea e na Alianza Atlántica de xeito constante e progresivo trala caída do telón de aceiro.

Macrorexión da ONU

Tendo en conta a división do mundo feita pola ONU, Europa Oriental é unha das macrorexións da ONU nas que se divide Europa. Esta clasificación inclúe 10 estados:

• Belarús
• Bulgaria
• Eslovaquia
• Hungría
• Moldavia
• Polonia
• República Checa
• Romanía
• Rusia
• Ucraína

Balcáns

Tradicionalmente tamén son incluídos nesta clasificación os países balcánicos:

• Albania
• Bosnia e Hercegovina
• Croacia
• Eslovenia
• Kosovo
• Macedonia do Norte
• Montenegro
• Serbia

Estados desaparecidos

Na Europa Oriental tamén se incluían:

•  Alemaña Oriental
• Checoslovaquia
• Iugoslavia

Repúblicas bálticas

As repúblicas bálticas non sempre son incluídas nesta clasificación, aparecendo ás veces dentro da macrorexión xeográfica de Europa do Norte:

• Estonia
• Letonia
• Lituania

Véxase tamén

Outros artigos

• Guerra fría