Pedro Fernandes de Queirós

Pedro Fernández de Quirós

Pedro Fernandes de Queirós, coñecido tamén en castelán como Pedro Fernández de Quirós, nado en Évora en 1565 e falecido en Panamá en 1614, foi un mariño e explorador portugués ao servizo da coroa española (por entón España e Portugal formaban un só reino).

Traxectoria

Moi novo incorporouse á Armada Española e fíxose mariño e navegante experimentado. En 1595 serviu como piloto nas exploracións de Álvaro de Mendaña de Neira polo suroeste do Pacífico, e desputoulle a Isabel de Barreto o título de gobernadora das Illas Salomón.

Como católico devoto, Quirós visitou Roma en 1600, onde obtivo apoio do papa, Clemente VIII, para seguir con outras exploracións. Foi a Perú en 1603 coa intención de atopar Terra australis, a "gran terra do sur mítica," e conquistala para España e a igrexa. A expedición de Quirós, con tres naves, Santos Pedro e Pablo, San Pedro e Os Tres Reis, partiu do Callao o 21 de decembro de 1605, con 300 mariñeiros e soldados.

En 1606 a expedición alcanzou as Tuamotu e as illas máis adiante chamadas Novas Hébridas (agora, como nación independente, Vanuatu). Quirós desembarcou nunha illa grande que creu era parte do continente meridional, e chamouna a Austrialia do Espírito Santo (mesturando as palabras Austral e Austria, dinastía reinante en España e Portugal). A illa aínda se chama Espírito Santo. Alí fundou unha colonia que chamou Nova Xerusalén. Pero a colonia foi pronto abandonada debido á hostilidade comprensible do Nin-Vanuatu-Vanuatu e aos desacordos entre os compoñentes da expedición.

Algunhas semanas despois Quirós fíxose ao mar outra vez. O mal tempo separouno das outras naves e non conseguía (ou iso dixo el máis adiante) volver á beira. Entón puxo rumbo a Acapulco en México, onde chegou en novembro de 1606. O seu segundo no mando, Luís Váez de Torres, logo de buscar inutilmente a Quirós, dirixiuse de novo a Espírito Santo descubrindo que era unha illa e seguiu buscando a Terra Australis, ata que abandonou a procura e dirixiuse a Manila.

Quirós volveu a Madrid en 1607. Tomado por tolo, pasou os sete anos seguintes na pobreza, escribindo numerosos memoriais relatando a súa viaxe e pedindo ao rei Filipe III diñeiro para unha nova viaxe. Enviárono a Perú con cartas de recomendación, pero o rei non tiña verdadeira intención de financiar outra expedición. Quirós morreu en Panamá en 1615.

O nome de Pedro Fernández de Quirós recórdase hoxe principalmente en Australia. Moitos autores asignan a Quirós a invención da palabra "Australia" na crenza que el nomeou as súas illas "Australia do Espírito Santo", mentres que realmente chamounas Austrialia do Espírito Santo.