Avelino López Otero

Avelino López Otero, nado en Acevedo, actualmente parte do concello de Ribeira de Piquín mais daquela pertencente ao concello de Meira, en 1903 e finado o 25 de setembro de 1936, foi un xornalista e político galego.

Traxectoria

Portada do anteproxecto do 3 de xullo de 1932.

Licenciouse en dereito e tras emigrar durante un tempo a Cuba instalouse na Coruña, onde foi correspondente de El Pueblo Gallego, dirixiu en Lugo o semanario republicano Guión (1930), no que colaboraron importantes políticos republicanos de Lugo e intelectuais e literatos de toda Galicia. Membro da masonería, traballou como secretario do seu irmán, o político César López Otero e con el foi o promotor da constitución do concello de Ribeira de Piquín, constituído o 5 de marzo de 1935. Avelino formou parte da comisión de técnicos que redactou o anteproxecto do Estatuto de Autonomía para a Asemblea que convocara o concello de Santiago de Compostela en 1932 e que constituíu a versión definitiva do estatuto que se plebiscitou en 1936. Despois de pertencer á Organización Republicana Gallega Autónoma e á Federación Republicana Gallega, foi secretario xeral do Partido Republicano Gallego entre 1933 e 1934, ata que se integrou en Izquierda Republicana. En 1933 figuraba como director de Tierra Gallega.

Detido a raíz da sublevación do 18 de xullo de 1936, morreu no Hospital de Lugo, onde fora trasladado o 17 de setembro dende a prisión de Lugo a consecuencia das feridas das malleiras.

Véxase tamén

Outros artigos

• Vítimas da Guerra Civil en Galicia

Ligazóns externas

• Ficha en Nomes e Voces.
• Ficha en Represión franquista en Lugo