O Milladoiro, Biduído, Ames

O Milladoiro. Núcleo de poboación do concello de Ames, o concello galego co menor promedio de idade, na provincia da Coruña. Orixinariamente un grupo de aldeas -Seidón, A Madalena , O Milladoiro, ...- experimentou, a partir do ano 1970, un progresivo crecemento en vivendas, dado o seu menor prezo en comparación coas situadas no veciño concello de Santiago de Compostela. Actualmente (2005) habitan nel máis de oito mil veciños que están a demandar a dotación de servizos e, en particular, de centros educativos.

Esta poboación, que atopamos á saída de Santiago, está dentro do término municipal de Ames e recórdanos co seu nome un dos famosos humilladoiros do Camiño de Santiago. Neste caso serían os peregrinos que chegaban a Compostela polo mar os que se axeonllaban e humillaban, ao ver desde aquí por primeira vez as torres da basílica compostelá. 0u quizais sexa o recordo do lugar onde os peregrinos depositaban unha pequena proba da súa peregrinación o día no que «as pedras falen» no xuízo final. Hai incluso quen pensa que os peregrinos botaban pedras sobre os cadáveres os que por algunha razón se lles negaba a sepultura eclesiástica.