Xémini (constelación)

Para ver referencias ó signo zodiacal ir a: Xémini

Gemini
Nome latino	Gemini
Abreviatura	Gem
Xenitivo	Geminorum
Simboloxía	Os Xemelgos
Ascensión recta	7 h
Declinación	20°
Área	514 graos cadrados Rango 30º
Número de estrelas (magnitude < 3)	4
Estrela máis brillante	Pólux (β Gem) (magnitude ap. 1.1)
Choiva de meteoros	Gemínidas Rho Gemínidas
Constelacións lindeiras	Lynx Auriga Taurus Orión Monoceros Canis Minor Cáncer
Visible en latitudes entre +90° e −60° Mellor visibilidade ás 21:00 (9 p.m.) durante o mes de Febreiro

Gemini ou Xémini (os Xemelgos, símbolo , Unicode ♊) é a terceira constelación del zodíaco, e atopase a uns trinta graos ó noroeste de Orión. William Herschel descobreu Urano preto de η Geminorum no 1781, e Clyde Tombaugh fixo o propio con Plutón preto de δ Geminorum.

Estrelas principais

Representación medieval de Gemini

• α Geminorum (Cástor) é a segunda estrela máis brillante da constelación (magnitude visual 1,58). Dase a circunstancia de que Cástor é en realidade un sistema de seis estrelas (sistema estelar múltiple), só visibles con telescopios potentes.
• β Geminorum (Pólux), a estrela máis luminosa da constelación (magnitude 1,16), xigante de cor laranxa a 36 anos luz de nós.
• γ Geminorum (Alhena), a terceira máis brillante con magnitude 1.93, unha binaria espectroscópica formada por unha subxigante branca acompañada dunha anana amarela.
• δ Geminorum (Wasat), sistema binario cunha estrela amarela e outra laranxa, pódese ver este sistema binario cun pequeno telescopio.
• ε Geminorum (Mebsuta), que se atopa na perna dereita de Cástor.
• ζ Geminorum (Mekbuda), estrela variable cunha magnitude que oscila entre 3,7 e 4,2 nun período de dez días.
• η Geminorum (Tejat Prior), sistema estelar onde a estrela principal é unha variable semirregular cunha magnitude oscila entre 3,2 e 3,9.
• μ Geminorum (Tejat Posterior), a cuarta máis brillante con magnitude 2,87, xigante vermella e variable irregular. Interesante para observación visual ou con prismáticos.
• ξ Geminorum (Alzir), de magnitude 3,35, unha subxigante amarela a 57 anos luz.
• σ Geminorum, estrela variable RS Canum Venaticorum.
• 1 Geminorum, sistema estelar múltiple de magnitude 4,15 que marca a posición do solsticio de verán.
• 37 Geminorum, anana amarela idéntica ó Sol que está sendo obxecto de gran interese por si existe vida no seu redor.
• U Geminorum, arquetipo dun tipo de estrela variable, as novas ananas.
• TU Geminorum, estrela de carbono dunha cor vermella intensa.
• HD 59686, xigante laranxa cun planeta ó redor.
• Geminga, pulsar que emite raios gamma e raios X; pensase que poden se-los restos dunha supernova que estourou fai uns 300.000 anos.

Obxectos notables do espazo profundo

• Cúmulo aberto M35 ou NGC 2168, facilmente visible con prismáticos: a través de calquera telescopio aparece formado por unha gran cantidade de estrelas de brillo medio.
• Moi preto de M35 e en claro contraste co mesmo, o cúmulo NGC 2158, moito máis antigo e distante.
• Cúmulo aberto NGC 2420, 4º ó leste de Wasat (δ Geminorum).

Ademais en Xémini hai varias nebulosas interesantes, entre as que destacan:

• NGC 2392, Cara de Pallaso ou Nebulosa Esquimó, de magnitude 10 cunha brillante estrela central.
• A pequea nebulosa planetaria NGC 2371.
• Abell 21 ou Nebulosa Medusa, nebulosa planetaria grande e antiga, de 5 arcmin de diámetro.
• IC 443, nebulosa difusa remanente dunha supernova, preto de Tejat Prior (η Geminorum).

Mitoloxía

Gemini, os Xemelgos.

Na mitoloxía grega, os xemelgos son Cástor e Polideuco (Pólux para os romanos). Naceron dun ovo que puso Leda, a raiña de Esparta, despois de copular con Zeus convertido en cisne. Cástor, o mortal, era fillo do rei Tíndaro; o inmortal Polideuco era fillo de Zeus.

Ambos participaron en varias fazañas colectivas: na cacería do xabarín de Calidón e na viaxe dos Argonautas, entre outras.

Os xemelgos tiveron unha disputa cós seus primos Idas e Linceo. Idas asasinou a Cástor cunha lanza, ós que Polideuco, a pesares das súas feridas, respondeu matando a Linceo. Zeus interveu e matou a Idas. Polideuco rexeitou a súa condición de inmortal se non podía compartila con Cástor. Por isto Zeus colocounos entre as constelacións.

Visualización gráfica

Diagrama da forma alternativa de conecta-las estrelas da constelación de Gemini. Un par de xemelgos collidos da man.

As estrelas da constelación de Gemini poden ser conectadas dun xeito alternativo, tal como amosa o gráfico, amosando a dous xemelgos collidos da man.

O xemelgo da dereita é Castor, onde a súa estrela maís brillante é alpha Geminorum (máis comunmente coñecida coma Castor), é de segunda magnitude, e representa a cabeza de Castor. O xemelgo da esquerda é Pollux, a súa estrela máis brillante é beta Geminorum (máis coñecida coma Pollux), é de primeira magnitude, e representa a cabeza de Pollux.

O torso de Pollux é representado pola estrela upsilon Geminorum, a man dereita de Pollux é representada por iota Geminorum, e a man esquerda por kappa Geminorum: as tres estrelas de cuarta magnitude.

A pelve de Pollux é a estrela delta Geminorum, o xeonllo dereito de Pollux é zeta Geminorum, e o pé dereito é gamma Geminorum, o xeonllo esquerdo de Pollux está representado pola estrela lambda Geminorum, e o pé por xi Geminorum. Gamma Geminorum é de segunda magnitude, delta e xi Geminorum son de terceira.

O torso de Castor está representado pola estrela tau Geminorum, a man esquerda por iota Geminorum (que é compartida con Pollux), e a man dereita é theta Geminorum: as tres estrelas son de cuarta magnitude.

A pelve de Castor está representada pola estrela epsilon Geminorum, o pé esquerdo por nu Geminorum, e o pé dereito por mu Geminorum e eta Geminorum: epsilon, mu, e eta Geminorum son de cuarta magnitude.

Véxase tamén

Outros artigos

• Messier 35

Ligazóns externas

• The Deep Photographic Guide to the Constellations: Gemini (en inglés)
• The clickable Gemini (en inglés)
• WIKISKY.ORG: Gemini constellation (en inglés)
• Star Tales – Gemini (en inglés)