Wikipedia:Xornal da Galipedia/01-05-2011/Encontros

O Xornal da Galipedia

← Volver aos contidos

Ollar o último número

01-05-2011

Encontros

O Clásico español segundo Galipedia

Por Elisardojm, 1 de maio de 2011

Aproveitando as vacacións de Semana Santa fixemos un pequeno encontro en Pontevedra o pasado día 20 de abril, descubrimos algúns recunchos da cidade e puxemos a caldo o proxecto :).

Descúbrese o lobby pontevedrés na Galipedia

Fronte á Basílica de Santa María de Pontevedra. De esquerda a dereita: Paradanta, Furado, Iago Pillado, Elisardojm, Estevoaei e Beninho. Lameiro a este lado da cámara.

Dixéronme na casa: ¿¿Y tenéis que reuniros para eso de la Galipedia el día del partido Barça-Madrid??. E teñen razón cando din que estamos tolos :).

Pois así foi, o día no que a nación española esperaba que pasaran as horas e os minutos para que chegase o momento xusto do acontecemento do ano, un pequeno grupo de galipedistas, resistindo sempre o invasor, desfrutaba do Sol e dalgunhas das xoias da cidade de Pontevedra coa escusa de repartir as camisetas do reto do oitavo aniversario da Galipedia.

Xuntámonos diante do concello Estevoaei, Paradanta, Lameiro, Beninho, Iago, Furado e eu.

Xusto ó lado do concello visitamos as ruínas do Convento de Santo Domingo, un conxunto de restos arquitectónicos e escultóricos que no seu tempo debeu ser unha das marabillas do contorno. Logo puxémonos a pasear ata a Basílica de Santa María a Maior, outra xoia da cidade que foi onde fixemos o roubado para a posteridade :). Seguimos camiñand, e, mentres falabamos de todo un pouco, da cidade de Pontevedra, de fotografía, de arquitectura, de historia e que sei eu!, pasamos tamén polo Museo de Pontevedra e visitamos así tres dos BIC dos moitos que ten a cidade.

Chegando á praza de San Xosé atopamos que estaba aberta a exposición "Pórtico da Gloria. Misterio e sentido", co que non houbo moito que falar para poñernos de acordo en visitala. Achegámonos así á Catedral de Santiago precisamente nos días que estaba a ser proposta para artigo sobre Galicia, ¿casualidade?, eu non o creo... ;)

Que lle pasen a conta ó do violín...

Despois de tanto paseo tiñamos que recuperar forzas e ó lado das estatuas de Alexandre Bóveda, Castelao, Manuel Quiroga, Valentín Paz Andrade, Carlos Casares e Ramón Cabanillas puxémonos a falar de todo o que se nos ocorreu da Galipedia, da wiki en castelán, de Commons e creo que só faltou o tema do sexo dos anxos...

Falamos da relevancia dos artigos, un problema bastante importante na wiki en castelán (...Me cuesta trabajo entender que en Argentina haya 2.119 futbolistas relevantes, por 780 escritores o 18 psiquiatras, pongamos por caso. O Argentina o nosotros estamos haciendo algo muy mal..., Fremen no café da wiki en castelán o 26/9/2010) e que tamén afecta á Galipedia en bastante medida. Falamos bastante sobre diso, puxemos exemplos chuscos e cavilamos un pouco sobre as posibles solucións, pero o tema é complexo e non se pode resolver en media hora no medio dunha praza :). Isto queda pendente para que alguén lle poña o axóuxere ó gato...

Tamén falamos de onde sería máis oportuno aloxar as imaxes dos proxectos, se na propia Galipedia ou en Commons. Creo que a maioría estabamos de acordo que era máis lóxico facelo en Commons por dúas razóns principais: é o proxecto adicado a iso dentro da Fundación Wikimedia, e é a mellor forma de compartir eses recursos xa que alí estarán dispoñibles para tódolos proxectos. O maior problema para usar Commons parecía estar no idioma principal dese proxecto, o inglés, que dificultaba a selección de categorías, licenzas e acceso á información do proxecto. Comentouse que o proxecto de Commons é multiidioma e que tódalas políticas e páxinas de axuda poden traducirse, que existe unha portada en galego e que a páxina de carga de ficheiros é moi sinxela de usar e tamén está traducida. A última barreira eran as categorías en inglés, e o que se propuxo foi que os que non fosen capaces de poñer a categoría axeitada que simplemente meteran as súas imaxes na categoría Galicia porque despois os usuarios máis expertos en Commons xa van ir poñendo pouco a pouco categorías máis específicas. Deste tema saíu a proposta que hai na Taberna de quitar a carga de ficheiros da Galipedia para facelo directamente en Commons.

Outro dos temas que se trataron foi o da baixa proporción de mulleres editoras na Galipedia, e nos proxectos wiki en xeral. Comentáronse algunhas ideas ó respecto pero non se chegou a nada claro. O que si saíu desta conversa foi outra proposta na Taberna, así que xa sabedes onde seguir falando do tema :).

O tempo pasou moi rápido esa tarde, chegaba a hora D e xa se nos coara nos ósos a friaxe da noitiña, levantamos o campamento ata a próxima e algúns escaparon a fume de carozo a levar o chasco do día, mágoa por eles, menos mal que tiveron o seu desquite ;).

Xa pasou o día e pasou a romaría, para a próxima xuntanza, máis e mellor!!.