Nervio cubital

O nervio cubital ou nervio ulnar é un nervio do membro superior humano. É unha póla terminal do fascículo medial do plexo braquial. Preto da súa orixe adoita recibir unha póla comunicante da raíz lateral do nervio mediano, que se orixina no fascículo lateral e porta febras de C7. O nervio cubital pasa polo brazo e antebrazo acadando a man, onde inerva todos os músculos intrínsecos desta (agás os tres músculos da eminencia tenar e os dous músculos lumbricais laterais). No seu traxecto polo antebrazo, dá lugar a pólas para inervar o músculo flexor cubital do carpo e a metade medial do músculo flexor común fondo dos dedos da man. O nervio cubital inerva a pel situada sobre a superficie palmar do quinto dedo, a metade medial do cuarto dedo, a pel da palma e pulso, e a da superficie dorsal da zona medial da man.

Inervacións

O nervio cubital inerva:

• Músculo flexor cubital do carpo
• Metade medial do músculo flexor común fondo dos dedos
• Músculo opoñente do V dedo
• Músculo abductor do V dedo
• Músculo flexor curto do V dedo
• Músculo aductor do I dedo
• Terceiro e cuarto músculo lumbrical da man
• Músculos interóseos dorsais da man
• Músculos interóseos ventrais da man
• Músculo flexor curto do I dedo
• Músculo palmar curto