Escudo portugués

O Escudo portugués, simbolizado polo cifrão (como o símbolo do dólar [$], pero con dúas barras verticais), foi a moeda oficial de Portugal antes do euro. O escudo deu orixe a outras variacións de Escudo nas colonias portuguesas africanas e asiáticas.

O seu código segundo a norma ISO 4217 é PTE.

A seu nome provén da imaxe que aparecía representada nas primeiras moedas dese valor: un escudo. Eran de ouro de 18 quilates, e valía 50 marcos.

Malia que o euro entrou en vigor o 1 de xaneiro de 2002, o escudo tivo validez ata o 28 de febreiro dese mesmo ano. A taxa de conversión entre escudos e euros foi establecida o 31 de decembro de 1998, sendo fixado o valor de 1 euro en 200,482 escudos.

Historia

No reinado de D. Duarte apareceu o medio-escudo de ouro, do que non se coñece nin o deseño. No reinado de D. Xoán V cuñáronse tamén as dobras, múltiplos do escudo. Tamén nos reinados de D. Xosé I, D. María I e D. Xoán VI se cuñaron escudos.

O decreto do 22 de maio de 1911 reformou profundamente, baixo o punto de vista técnico, o sistema monetario vixente en Portugal, alterando a denominación de tódalas moedas, o material, o peso, e as dimensións das pezas de bronce, e substituiu o real polo escudo de ouro. Dividido en 100 partes iguais, denominadas "centavos", o escudo correspondía, tanto no valor como no peso de ouro fino, á moeda de 1.000 réis. Como múltiplos, creáronse moedas de ouro, que nunca se chegaron a acuñar, de 2, 5 e 10 escudos, e como submúltiplos, moedas do valor legal de 10, 20 e 50 centavos, e moedas subsidiarias de bronce e níquel de valor legal de 4, 2, 1 e ½ centavos, que, agás a última, chegaron a ser acuñadas.

Depois de 1914, debido á crise provocada pola Primeira Guerra Mundial, o escudo-papel (billetes) experimentou un descenso vertixinoso de valor, acadando a súa menor correspondencia en ouro en xullo de 1924. Desde o segundo semestre de 1926 ata abril de 1928 o escudo sofriu novas desvalorizacións, como consecuencia de dous aumentos de circulación, do agravamento da débeda fluctuante interna e externa, e do case total esgotamento das reservas de ouro que o Tesouro Nacional posuía en Londres.

Polo decreto nº 19.869 do 9 de xuño de 1931 lanzáronse as bases dun novo sistema monetario, para manter a estabilización do valor desta moeda. O escudo de ouro continuaba sendo a unidade monetária, mais cun peso inferior, servindo apenas como moeda-padrón.

Moedas

As moedas en circulación antes da chegada do euro eran as seguintes:

1 escudo (1987)

Ficheiro:PRT005.JPG

5 escudos (1987)

Ficheiro:PRT003.JPG

10 escudos (1987)

20 escudos (1987)

Ficheiro:PRT006.JPG

50 escudos (1987)

Ficheiro:PRT032.JPG

100 escudos (1998)

200 escudos (1991)

• 1 escudo
• 5 escudos
• 10 escudos
• 20 escudos
• 50 escudos
• 100 escudos
• 200 escudos

Billetes

Última serie

A última serie de cédulas portuguesas, composta de cinco valores, estaba dedicada a importantes navegadores da época dos descobrementos portugueses.

• 500 escudos: 125 x 68 mm. Tonalidade vermella e marrón. No anverso aparece João de Barros, e no reverso dous navegadores da época e dous navíos pequenos.

• 1000 escudos: 132 x 68 mm. Tonalidade violeta e marrón. No anverso aparece Pedro Álvares Cabral, e no reverso unha caravela e de fundo unha selva.

• 2000 escudos: 139 x 68 mm. Tonalidade azul. No anverso aparece Bartolomeu Dias, e no reverso unha caravela, a rosa dos ventos e un compás; de fundo un mapa antigo de África e Europa.

• 5000 escudos: 146 x 75 mm. Tonalidade verde. No anverso aparece Vasco da Gama, e no reverso unha caravela e un conxunto de personaxes da época.

• 10.000 escudos: 153 x 75 mm. Tonalidade vermella e ocre. No anverso aparece o Infante Don Henrique, e no reverso unha caravela.

Véxase tamén

Ligazóns externas

• Imaxes de billetes portugueses (en inglés)
• Banco de Portugal