Radio (óso)

Para outras páxinas con títulos homónimos véxase: Radio.

O radio é o óso externo do antebrazo. Trátase dun óso longo. O radio humano ten a seguinte estrutura:

Estrutura

• Epífise superior: Contén unha cúpula, un pescozo e unha tuberosidade. A cúpula artéllase co cóndilo umeral, o pescozo está rodeado polo ligamento anular (que provén do cúbito) e na tuberosidade insírese o bíceps braquial.
• Diáfise: Presenta tres superficies e tres bordos:
  • Superficie anterior: Insírese o flexor longo do primeiro dedo. Por debaixo atópase o burato nutricio do óso e no terzo inferior o pronador cadrado.
  • Superficie posterior: Insírense o abdutor e extensor longos do primeiro dedo. Na parte máis externa áchanse as febras de inserción do supinador curto.
  • Superficie externa: Insírense o supinador curto e pronador redondo.
  • Bordo interno: Insírese a membrana interósea.
  • Bordo antero-externo e antero-interno son pouco importantes.
• Epífise inferior: É dunha superficie moito maior ca da epífise superior. Presenta seis superficies:
  • Superficie superior: Continúase co resto do óso.
  • Superficie inferior: Artéllase co escafoide e co semilunar. Entre as dúas superficies articulares hai un relevo: crista radio-escafo-lunar.
  • Superficie anterior: Insírese o pronador cadrado.
  • Superficie posterior: Consta de dúas zonas de paso:
    • Posterior: Pasan o extensor propio do índice, extensor común dos dedos e extensor longo do polgar.
    • Postero-externa: Pasan os tendóns dos primeiro e segundo radiais externos, abdutor longo do polgar e extensor curto do polgar
  • Superficie interna: Artéllase co cúbito
  • Superficie externa: Continúase coa apófise estiloide, na que se insire o supinador longo.

Articulacións

Artigo principal: Cóbado Artigo principal: Articulacións radiocubitais

• Co úmero, formando parte do cóbado
• Co cúbito, formando as articulacións radio-cubitais.

Funcións

• Sostén
• Pronación e supinación, grazas aos músculos: supinador longo, curto, bíceps braquial, pronador redondo e pronador cadrado.