Alacantí

Casa do Concello de Alacante

Mercat Central de Alacante

O Alacantí é unha comarca do sur do País Valenciano con capital en Alacante. Limita ao norte co Alcoià, ao leste coa Marina Baixa e o mar Mediterráneo, ao sur co Baix Vinalopó e ao oest co Vinalopó Mitjà.

A comarca presenta dous espazos claramente diferenciados a nivel demográfico, social, económico e de marco físico: por unha banda está a Horta de Alacante, área moi densamente poboada repartida sobre unha superficie case plana, e doutra banda uns municipios periféricos, situados en altura, entre os que se atopa unha subcomarca formada por Xixona e La Torre de les Maçanes, a Foia de Xixona.

Municipio	Poboación	Extensión	Densidade
Agost	4.766	66,64	71,5
Aigües	951	18,47	51,5
Alacante	322.673	201,27	1.603,2
Busot	2.847	33,84	84,1
El Campello	25.055	55,27	453,3
Mutxamel	20.364	47,65	427,4
Sant Joan d'Alacant	20.997	9,64	2.178,1
Sant Vicent del Raspeig	49.341	40,55	1.216,8
La Torre de les Maçanes	745	36,48	20,4
Xixona	7.533	163,76	46,1
Totais:	455.292	673,57	675,9

A comarca histórica da Horta de Alacante correspóndese coa conurbación de Alacante, un conxunto urbano que engloba ademais da capital, a Sant Joan d'Alacant, Mutxamel, Sant Vicent del Raspeig e El Campello (o área metropolitana de Alacante-Elxe inclúe a case todos os demais municipios da comarca e os do baix Vinalopó: Elxe, Santa Pola e Crevillent). Centrada sobre a cidade de Alacante, o resto de núcleos urbanos atópanse a modo de prolongacións da expansión urbana, servindo como zonas residenciais (todas elas), de expansión industrial (Sant Vicent) ou especializadas cara ao turismo (El Campello). Fortemente urbanizada, esta aglomeración presenta unha densidade de poboación de 1.226 hab/km². No plano agrícola, que é ao cal debe o seu nome, a Horta de Alacante consiste nun territorio relativamente plano de terras fértiles, convertido ao regadío grazas principalmente ao uso das augas do río Montnegre.

Á parte de Agost, o resto das poboacións constitúen a histórica comarca da Foia de Xixona, con Xixona, La Torre de les Maçanes, Busot, e Aigües. Trátase en realidade de poboacións de transición entre a Horta de Alacante e outras comarcas (respectivamente, a Foia de Xixona co Alcoià, Agost co Vinalopó Mitjà e Busot e Aigües coa Marina Baixa). Salvo Xixona, poboación industrial que é deles o maior núcleo urbano, os demais núcleos de poboación son de tipo rural, contrastando enormemente coas poboacións da Horta de Alacante. Non en balde, esta serie de municipios periféricos presenta unha densidade de poboación de tan só 50,3 hab/km², unhas 24 veces menor que a da conurbanización alacantina.

Lingua

O valenciano é a lingua de predominio lingüístico da comarca.

Historia

Durante a colonización cristiá na idade media, a comarca do Alacantí foi das últimas conquistadas aos árabes, a conquista foi pacífica e o territorio vai ser adscrito a Castela, en 1244, en virtude do tratado de Almizra, habendo pouco tempo despois unha sublevación musulmá en 1248 sufocada coa axuda de Jaume I. Despois de anos de disputas no 1304 Dinís de Portugal, o infante Xoán I de Castela e o bispo de Zaragoza, pola Sentencia de Torrelles acordan deixala definitivamente adscrita ao Reino de Valencia as terres do Alacantí, baixo reinado do rei Jaume II o Xusto.

Economía

A poboación é considerabelmente densa e os seus principais núcleos son: Sant Vicent del Raspeig, con industrias de cemento e papeleira, típica cidade dormitorio, onde se atopa a Universidade de Alacante. En Agost prodúcese baldosa destinada á construción e cantaría tradicional, en Sant Joan d'Alacant tamén outro municipio dormitorio que ten outra universidade, a de Miguel Hernández, ademais de numerosas grandes superficies comerciais, e El Campello, con porto pesqueiro.

Alacante, a capital da comarca, experimentou un rápido desenvolvemento, especialmente a partir do século XVIII, debido ao seu activo comercio marítimo. Ten unha variada industria de aluminio, química, talleres metalúrxicos e de motores, cerámica, alimentaria, do tabaco, etc., ademais de ser un centro pesqueiro. Isto no entanto, unha das actividades máis importantes da comarca constitúena o turismo, fundamentalmente á Praia de Sant Joan, e os sectores económicos relacionados.

Enlaces externos

• Datos e cifras da comarca do Alacantí. Unidade de Documentación da Deputación de Alacante
• As Torres de Defensa da Horta de Alacante
• Concello de Alacante
• Concello de Sant Vicent del Raspeig
• Concello de El Campello
• Concello de Sant Joan d'Alacant
• Concello de Mutxamel
• Concello de Agost
• Concello de Busot