Emre Çolak

Emre Çolak

Biografía
Nacemento	20 de maio de 1991 (34 anos) Eminönü, Turquía
Altura	168 cm
Peso	62 kg
Actividade
Ocupación	futbolista
Período de actividade	17 de xaneiro de 2010 -
Nacionalidade deportiva	Turquía
Deporte	fútbol
Posición de xogo	Extremo esquerdo
Número deportivo	52
Traxectoria   Deporte base 2004–2009 Galatasaray Spor Kulübü   Equipo 2006–2006 Turkey national under-15 football team 2 (0) 2010–2016 Galatasaray Spor Kulübü 132 (10) 2012– Turquía B 2016–2018   Deportivo da Coruña (5) 2018–2019 Al Wehda FC 15 (1) 2019–2020   Deportivo da Coruña 16 (2) 2020–2021 Fatih Karagümrük SK 9 (0) 2021–2021 Hatayspor Kulübü 9 (0) 2021–2022 İstanbul Büyükşehir Belediyespor 7 (0) 2022–2023 Göztepe 9 (0) 2023–2023 CF Intercity 9 (0)   Selección nacional 2006–2008   Turquía sub-16 21 (3) 2007–2009   Turquía sub-17 30 (5) 2008–2009 Turkey national under-18 football team 11 (3) 2009–2010   Turkey national under-19 football team 10 (4) 2010–2010   Turquía sub-20 2 (0) 2010–2012   Turquía sub-21 15 (2) 2012–   Turquía

Emre Çolak, nado en Istambul o 20 de maio de 1991, é un exfutbolista turco, que xogaba como centrocampista ofensivo e extremo. Formado na canteira do Galatasaray, xogou seis anos no primeiro equipo, co que gañou nove títulos, entre eles tres campionatos da Süper Lig. Nos seguintes anos militou en varios clubs máis, entre eles o Deportivo da Coruña, no que xogou en dúas etapas diferentes, militando tanto na Primeira División como na Segunda.

Foi catro veces internacional coa selección turca, despois de disputar preto dun cento de partidos coas categorías inferiores.

Traxectoria

Comezos

Naceu no barrio de Eminönü, da cidade de Estambul, no seo dunha familia de inmigrantes procedentes de Mesudiye, na provincia de Ordu. Durante a súa infancia trasladouse coa familia ao barrio de Atışalanı, no distrito de Esenler, onde ingresou na canteira do Atışalanıspor con 11 anos. Xogando neste club chamou a atención do Beşiktaş, co que adestrou un par de meses. Con todo, a longa distancia dende a súa casa ata as instalacións deportivas fixeron que acabase regresando ao Atışalanıspor.

Galatasaray

Despois de xogar un partido contra un equipo do Galatasaray, fixouse nel o adestrador rival, Recep Yazıcı, que o acabou levando ao club vermello e amarelo. Foi pasando polas diferentes categorías inferiores do club, xogando habitualmente como dianteiro, ata que foi recolocado na posición de extremo.

O 17 de xaneiro de 2010 debutou co primeiro equipo na Copa de Turquía, nun partido contra o Denizli Belediyespor no estadio Ali Sami Yen. O adestrador Frank Rijkaard deulle entrada no segundo tempo como substituto do internacional Caner Erkin e Çolak marcou dous goles (o primeiro de penalti e o segundo de libre directo), completando así a goleada por 5-1 do seu equipo. Seis días despois xogou o seu primeiro encontro na Süper Lig, substituíndo ao seu ídolo Arda Turan nos instantes finais do partido contra o Gaziantepspor. Pechou a tempada cun total de 11 partidos, cifra que superou na seguinte campaña, con Gheorghe Hagi como técnico, disputando 17 encontros.

Coa chegada ao banco en 2011 do histórico adestrador Fatih Terim, perdeu protagonismo no equipo. Chegou a pensar en pedirlle ao club unha cesión a outro equipo en busca de máis minutos, ata que un derbi contra o Fenerbahçe no que xogou como titular marcou un punto de inflexión na súa carreira. A partir dese partido asentouse na titularidade como extremo esquerdo, contribuíndo a que o seu club gañase o título de liga despois de tres tempadas en branco. Na seguinte campaña revalidou o título de liga, ao que sumou a Supercopa, e debutou na Liga de Campións ante o Manchester United.

Nas seguintes campañas sumou un novo campionato de liga e tres da Copa de Turquía, ademais de dúas novas Supercopas, elevando ata nove os seus títulos co Galatasaray. Deixou o club en 2016, despois de 180 partidos oficiais nos que marcou 19 goles e repartiu outras tantas asistencias.

Deportivo da Coruña (1ª etapa)

O 27 de maio de 2016 anunciouse a súa fichaxe polo Deportivo da Coruña, tras asinar un contrato por tres tempadas. Converteuse así no primeiro futbolista turco nos 110 anos de historia do club. Debutou co equipo na Primeira División na segunda xornada da tempada 2016/17, nun partido contra o Betis no Benito Villamarín. Saíu como titular, formando no centro do campo xunto a Guilherme, Mosquera, Fayçal Fajr e Bruno Gama, nun encontro que rematou sen goles.

Ao longo da tempada contou coa confianza do adestrador Gaizka Garitano, así como do seu substituto no banco, Pepe Mel. Disputou un total de 36 partidos, 31 deles como titular e repartiu 10 asistencias, formando unha destacada dupla xunto ao romanés Florin Andone. Tamén provocou un episodio de indisciplina nun adestramento, motivo polo que o adestrador Garitano o castigou sen convocalo para o derbi galego contra o Celta de Vigo.

Na tempada 2017/18 tivo un papel secundario e non dispuxo de demasiadas oportunidades ata a chegada do terceiro técnico da campaña, o neerlandés Clarence Seedorf. Durante a parte final da competición callou boas actuacións, pero non puido evitar o descenso do equipo á Segunda División. O 1 de xuño de 2018, tras dúas tempadas no equipo coruñés, anunciouse a súa marcha ó Al-Wehda Club de Arabia Saudita. O seu irregular primeiro paso polo Deportivo pechouse cun total de 73 partidos e 5 goles.

Al-Wehda

Debutou na liga saudita o 30 de agosto de 2018, nun partido ante o Al-Hazem SC en Buraidah. Foi titular nos oito primeiros encontros de liga, marcando un gol ante o Al-Ittihad na Cidade Deportiva do Rei Abdalá, pero foi perdendo peso nas seguintes xornadas, ata desaparecer das convocatorias do adestrador Fábio Carille a partir de febreiro de 2019. Xogou o seu último partido no país o 24 de agosto de 2019, fronte ao Al-Ettifaq FC.

Deportivo da Coruña (2ª etapa)

Tras rescindir o contrato co club saudita estivo varios meses sen equipo, ata que o 31 de decembro de 2019 se oficializou o seu regreso ao Deportivo da Coruña para o resto da tempada 2019/20. Reapareceu coa camiseta do Deportivo o na 23ª xornada ante o Racing de Santander en Riazor. Saltou ao terreo de xogo no minuto 31 como substituto de Javi Montero, cando o marcador sinalaba un 0-1 a favor dos cántabros, e no segundo tempo marcou o 2-1 definitivo co que o Deportivo selaba a remontada. Celebrou o gol cos seareiros na bancada, recibindo o seu segundo cartón amarelo, polo que foi expulsado por Ávalos Barrera.

Contou coa confianza do adestrador Fernando Vázquez, e tras cumprir a sanción xogou como titular nas nove xornadas seguintes. Na 36ª xornada saíu dende o banco contra a Ponferradina e na última xogada do partido marcou o gol da vitoria, culminando unha nova remontada (2-1). Con este gol o Deportivo colocábase tres puntos por riba dos postos de descenso, pero tres derrotas nas catro últimas xornadas condenaron ao club ao descenso á Segunda División B catro décadas despois.

Fatih Karagümrük

Tras rematar o seu contrato co Deportivo continuou adestrando pola súa conta na Coruña durante uns meses, ata que en decembro de 2020 asinou como novo xogador do Fatih Karagümrük, regresando así ao fútbol turco catro anos despois. Disputou nove encontros co equipo na Süper Lig, ata que en marzo foi suspendido polo seu propio club por ter realizado unhas declaracións nas que afirmaba que na loita polo campionato de liga o seu corazón estaba co Galatasaray. Dúas semanas despois o seu contrato foi rescindido.

Hatayspor

Para a tempada 2021/22 fichou polo Hatayspor, co que xogou oito partidos de liga e un da Copa de Turquía. Con todo, en decembro o club e o xogador rescindiron o seu contrato de mutuo acordo.

İstanbul Başakşehir

Uns días despois de deixar o club de Antioquía, asinou polo İstanbul Başakşehir. Apenas contou con protagonismo no equipo dirixido por Emre Belözoğlu, xogando só 128 minutos repartidos en sete encontros.

Göztepe

O 1 de agosto de 2022 converteuse en novo xogador do Göztepe. Tampouco tivo regularidade no equipo de Ekrem Dağ, co que disputou nove encontros. Foi titular só en dous partidos, recibindo un cartón vermello nun deles, tras unha lea co capitán do Tuzlaspor, Rajko Rotman.

Intercity

Emre Çolak xogando co Galatasaray en 2013.

En xaneiro de 2023 volveu a España para fichar polo Intercity, da Primeira Federación. Debutou nun partido ante o Bilbao Athletic e uns días despois anunciou a súa retirada do fútbol, conmocionado polos terremotos de Turquía e Siria que deixaron milleiros de mortos no seu país. Con todo, acabou por volver vestir a camiseta do club en oito partidos máis, antes da súa retirada definitiva tras deixar o Intercity en maio.

Selección turca

Despois de xogar preto dun cento de partidos en todas as categorías inferiores da selección turca, en 2012 debutou coa absoluta, nun partido ante Romanía no estadio Şükrü Saracoğlu de Istambul. Foi nun encontro de clasificación para a Copa do Mundo de 2014, no que o seleccionador Abdullah Avcı lle deu entrada na segunda metade como substituto de Sercan Sararer. Despois de tres anos sen ser convocado, regresou en 2015 e disputou tres encontros internacionais máis, contra Grecia, Moldova e Macedonia, todos eles amigables.

Palmarés

Galatasaray

• Süper Lig (3): 2011/12, 2012/13, 2014/15.
• Copa de Turquía (3): 2013/14, 2014/15, 2015/16.
• Supercopa de Turquía (3): 2012, 2013, 2015.

Véxase tamén

Ligazóns externas

• Datos do xogador en BDFutbol (en castelán)
• Perfil en UEFA.com (en inglés)
• Perfil en FIFA.com Arquivado 19 de agosto de 2016 en Wayback Machine. (en inglés)