Edward O. Leech
Edward O Leech Director da Casa da Moeda dos Estados Unidos (1889-1893) | |
Biografía | |
---|---|
Nacemento | 9 de decembro de 1850 Washington |
Morte | 1 de maio de 1900 (49 anos) Nova York |
Causa da morte | Morte natural (Apendicite) |
Datos persoais | |
País de nacionalidade | Estadounidense |
Educación | Universidade Columbia Universidade George Washington. |
Actividade | |
Ocupación | Alto funcionario e político dos EEUU. |
Partido político | Partido Republicano |
Notes Membro de: United States Assay Commission. |
Edward Owen Leech, nado en Washington o 9 de decembro de 1850 e finado en Nova York o 1 de maio de 1900, foi un alto funcionario e político estadounidense, director da Casa da Moeda dos Estados Unidos entre 1889 e 1893.
Traxectoria[editar | editar a fonte]
Orixe familiar[editar | editar a fonte]
Edward O. Leech naceu o 9 de decembro de 1850 en Washington, onde o seu pai, Daniel D. Tompkins Leech (1810-1869) tiña a súa praza como funcionario do Servizo Postal dos EEUU e, posteriormente, do Departamento do Tesouro. Edward O. Leech era descendente directo de Lawrence Leach (1589-1662), un inglés establecido en Salem, Massachusetts, en 1629. Ademais, un avó de Edward O. Leech, o capitán Hezekiah Leach, loitou na Guerra de Independencia dos EEUU.[1][2]
Carreira profesional[editar | editar a fonte]
Edward O. Leech recibiu a súa educación secundaria no Instituto de Everett, en Washington, e logo cursou estudos superiores na Universidade Columbia, na que se graduou en 1869, ano en que tamén faleceu o seu pai.[2][3]
Ese mesmo ano comezou tamén a exercer como empregado na Oficina de Estatística do Departamento do Tesouro. No marco da reorganización da Casa da Moeda dos Estados Unidos, a raíz da Lei da Moeda de 1873, o daquela director da institución, Henry Linderman, invitou a Leech a se converter nun dos seus axudantes. Posteriormente traballou como responsable de ensaios, como axustador de contas e como contador de metal precioso.[2][3]
Paralelamente, Leech continuou a súa formación académica e en 1886 acadou o seu mestrado na Facultade de Dereito da Universidade Nacional en Washington, aínda que decidiu permanecer vinculado profesionalmente á US Mint, no canto do exercicio da práctica xurídica.[3]
O 16 de outubro de 1889, o presidente Benjamin Harrison nomeou a Leech director da Casa da Moeda dos EEUU, en substitución de Linderman. Leech tiña 38 anos e era a persoa máis nova en acceder ao posto de director.[3] The New York Times publicou un editorial situándose en contra deste nomeamento, argumentando que o presidente o levara a cabo simplemente porque Leech encubrira o fillo do presidente nun escándalo relacionado cun negocio fraudulento en Montana.[4] Leech exerceu o cargo de director da ceca pública entre outubro de 1889 e maio de 1893, data en que se retirou do seu servizo para a Administración, a raíz dun cambio de Goberno.[2]
Fóra xa do ámbito administrativo, Leech ocupou postos directivos na banca, como o de vicepresidente do National Union Bank e tamén do National Bank of Commerce, ambos de Nova York.[2]
Ademais, no ámbito político, na Convención Nacional Republicana celebrada en San Luís en 1896, Leech xogou un papel moi relevante na aprobación dun punto polo que o seu partido se amosaba favorable ao mantemento do padrón ouro.[2]
Vida familiar[editar | editar a fonte]
Leech casou o 25 de outubro de 1871 con Celia Kelen Kent, de Pittsburg, Pensilvania,[5] con quen tivo tres fillos. Celia faleceu en 1889.[2]
O 1 de maio de 1900, Leech faleceu no hospital Mount Sinai, en Nova York, por mor das complicacións dunha apendicite.[2]
Notas[editar | editar a fonte]
- ↑ Evans, G. G. (1893). Páxina 96.
- ↑ 2,0 2,1 2,2 2,3 2,4 2,5 2,6 2,7 "Edward Owen Leech". En The Bankers Magazine. Volume 60. Nº 5. Bradford-Rhodes & Company, Nova York. 1900. Páxinas 698-699.
- ↑ 3,0 3,1 3,2 3,3 Evans, G. G. (1893). Páxina 97.
- ↑ "Paying for Whitewash". En The New York Times. 8 de outubro de 1889.
- ↑ Evans, G. G. (1893). Páxina 98.
Véxase tamén[editar | editar a fonte]
Wikimedia Commons ten máis contidos multimedia na categoría: Edward O. Leech |
Bibliografía[editar | editar a fonte]
- Evans, G. G. (1893). Illustrated history of the United States mint... G. G. Evans, Filadelfia. Páxinas 96-98.
Outros artigos[editar | editar a fonte]
Ligazóns externas[editar | editar a fonte]
- Publicacións de Edward O. Leech (Internet Archive)
Predecesor: James P. Kimball |
Director da Casa da Moeda dos Estados Unidos 1889 - 1893 |
Sucesor: Robert E. Preston |
- Nados en 1836
- Finados en 1911
- Nados en Washington
- Directores da Casa da Moeda dos Estados Unidos
- Membros da Comisión de Ensaios dos Estados Unidos
- Alumnos da Universidade de Columbia
- Alumnos da Universidade George Washington
- Políticos do Partido Republicano dos Estados Unidos de América
- Finados por apendicite