Deporte en Vigo

No concello de Vigo operan máis de 200 asociacións e entidades deportivas que, en colaboración coa Concellería de Deportes, traballan para dinamizar, fomentar e promover a práctica de actividades físico-deportivas.

No 2010, a cidade foi distinguida co Premio do Consello Superior de Deportes (CSD), no marco dos Premios Nacionais do Deporte, como recoñecemento ás iniciativas impulsadas para o fomento do deporte.^[1]

Fútbol

Celta de Vigo

O club máis representativo da cidade é o Real Club Celta de Vigo, fundado en 1923 a partir da fusión do Real Vigo Sporting e a Real Fortuna, que ata entón rivalizaban pola hexemonía do fútbol galego e alternábanse na conquista dos campionatos rexionais; o Vigo Sporting chegou mesmo a proclamarse subcampión de España en 1908. O Celta é o club galego con máis tempadas en Primeira División. Entre os seus principais logros figuran tres subcampionatos da Copa de España (1948, 1994 e 2001) e a súa participación en competicións continentais, sendo o primeiro club galego en disputar torneos europeos, ao debutar na Copa da UEFA en 1971 e conquistar a Copa Intertoto en 2000. O equipo compite na Primeira División do fútbol español e ten equipos filial e feminino, o Real Club Celta Fortuna e As Celtas, respectivamente.

Coruxo

O segundo club en importancia en Vigo é o Coruxo, club de fútbol da parroquia homónima. Fundado orixinalmente en 1930 e refundado en 1946, compite na Segunda División RFEF, a cuarta categoría do fútbol nacional. Xoga os seus partidos como local no Campo do Vao, con capacidade para 1 500 espectadores. Competiu durante 11 temporadas na Segunda División B, e é o club 116º na clasificación histórica.

Rápido de Bouzas

Fundado en 1914, é o cuarto equipo de fútbol máis antigo de Galicia, só por detrás do Deportivo da Coruña, do Unión Campestre de Montrove e do Deportivo Coia.^[2] O club acadou o seu cumio deportivo entre 2017 e 2019, cando militou durante dúas tempadas na Segunda División B, terceira categoría do fútbol español.^[3]

No equipo militaron xogadores destacados como Pahiño, quen xogou coa selección española e foi dúas veces Pichichi, Manolo Tomé, que chegou gañar unha liga co Fútbol Club Barcelona, ou Iago Aspas.^[4]

Gran Peña

O Gran Peña é o cuarto club en importancia vigués. Con máis de corenta tempadas na Terceira División, o Gran Peña fundouse en 1926 na parroquia viguesa de Lavadores. Entre os anos 2021 e 2023 funcionou como terceiro filial do Celta de Vigo, baixo a denominación de Celta C-Gran Peña.

En 1958 proclamouse por primeira vez campión da Copa Galicia de fútbol ao derrotar o Lugo en tres partidos. En 1981 eliminou o Racing de Santander na segunda eliminatoria da Copa do Rei, nos penaltis, e logo de empatar a cero goles tanto no Sardinero como en Balaídos. Despois caería eliminado polo Elx.

Outros equipos

Outros equipos de fútbol da cidade son:

Baloncesto

O máximo representante do baloncesto vigués é o Celta Baloncesto feminino, que posúe 5 títulos do Campionato de Liga (e tamén 6 subcampionatos) e 4 da Copa da Raíña. O club foi fundado no verán de 1996 logo da adquisición da praza do Juventud Astur (Aucalsa) de Oviedo. Xa no ano da súa fundación o equipo conseguiu o seu primeiro título nacional, a Copa Galicia.

Outros clubs de baloncesto da cidadade son:

Club Baloncesto Salesianos
Club Baloncesto Seis do Nadal
Basquet Rías Baixas
Asociación Deportiva Basketgal
Club Baloncesto San Xosé da Guía
Club Baloncesto Andersen
Club Baloncesto Rodaballo
Club Baloncesto Xestas
Club Deportivo Vigo Basket
Club Novobasket Vigo

Balonmán

O club máis laureado de balonmán vigués foi a Sociedade Deportiva Octavio, que chegou a competir varias temporadas na Liga ASOBAL. Porén, foi disolto no ano 2019 logo de varios anos de perda de equipos federados, por mor de problemas económicos.^[5]

Outros equipos de balonmán da cidade son: