Cuéllar é unha vila e municipio da provincia de Segovia, na comunidade autónoma de Castela e León.
Está situado ao noroeste da provincia, e a medio camiño entre as cidades de Segovia e Valladolid, a 60 km e 50 km respectivamente. É cabeza do partido xudicial de Cuéllar, un dos cinco nos que se divide a provincia, así como da Comunidade de Vila e Terra de Cuéllar; pertence ademais á comarca natural Tierra de Pinares.
Aséntase no límite onde confinan as provincias de Segovia e Valladolid, sobre unha chaira atravesada de leste para oeste polo río Cega e delimitada ao outro extremo por unha gran cortada paralela ao mesmo e ao norte, que divide o termo municipal.
