Cronoespecie

Unha cronoespecie é unha especie derivada dun padrón de desenvolvemento secuencial que implica cambios continuos e uniformes desde unha forma ancestral extinta nunha escala evolutiva. A secuencia de alteracións finalmente produce unha poboación que é fisicamente, morfoloxicamente, e/ou xeneticamente distinta dos seus antepasados orixinais. Ao longo do cambio, hai unha soa especie na liñaxe en calquera momento do tempo, o que é o oposto dos casos nos que a evolución diverxente produce especies contemporáneas cun antepasado común. O termo relacionado paleoespecie indica unha especie extinta só identificada por material fósil. Esa identificación depende das semellanzas entre os espécimes fósiles máis antigos e algún descendente proposto, aínda que a relación exacta coa última especie non está sempre definida. En concreto, o rango de variación dentro de todos os espécimes fósiles antigos non excede o rango observado que existe coa última especie.

Unha paleosubespecie identifica unha subespecie extinta que evolucionou á forma actualmente existente. A conexión con variacións relativamente recentes, usualmente do Plistoceno tardío, a miúdo depende da información adicional dispoñible no material subfósil. A maioría das especies actuais cambiaron de tamaño e así adaptáronse aos cambios climáticos durante o último período glacial (ver regra de Bergmann).

A identificación de espécimes fósiles como parte dunha "cronoespecie" fundaméntase tamén en semellanzas adicionais que indican máis fortemente unha relación específica cunha especie coñecida. Por exemplo,^[2] espécimes relativamente recentes, cunha antigüidade de centos de miles a uns poucos millóns de anos con variacións consistentes (como ser cada vez máis pequenos pero coas mesmas proporcións) respecto a unha especie viva poderían representar o paso final da cronoespecie. A posible identificación do devanceiro inmediato do taxon vivo pode tamén depender de información estratigráfica para establecer a idade dos espécimes.

O concepto de cronoespecie está relacionado co modelo de gradualismo filético da evolución, e tamén depende dun amplo rexistro de material fósil, dado que os cambios morfolóxicos se acumulan co tempo, e dous organismos moi diferentes poderían estar conectados por unha serie de organismos intermedios.

Exemplos

Bison (varias paleoespecies e paleosubespecies)
Preguiceiros mariños Thalassocnus (paleoespecie)
Voitre Coragyps (cronoespecie)
Gymnogyps (paleoespecie)
Panthera (numerosas cronoespecies, paleoespecies e paleosubespecies)
Valdiviathyris (sen cambios visibles desde o Priaboniano, hai 35 millóns de anos).^[3]

Notas

↑ Evolutionary species vs. chronospecies do Dr. Steven M. Carr, Memorial University of Newfoundland biology department
↑ Howard, Hildegarde (1947). "An ancestral Golden Eagle raises a question in taxonomy" (PDF). The Auk 64 (2): 287–291. JSTOR 4080550. doi:10.2307/4080550.
↑ Systematics and Biodiversity5: 123–131 doi 10.1017/S1477200006002179

Véxase tamén

Outros artigos

Ortoxénese

Bibliografía

Stanley, S. M. (1978) "Chronospecies' longevities, the origin of genera, and the punctuational model of evolution," Paleobiology, 4, 26–40.

[1] Evolutionary species vs. chronospecies do Dr. Steven M. Carr, Memorial University of Newfoundland biology department

[2] Howard, Hildegarde (1947). "An ancestral Golden Eagle raises a question in taxonomy" (PDF). The Auk 64 (2): 287–291. JSTOR 4080550. doi:10.2307/4080550.

[3] Systematics and Biodiversity5: 123–131 doi 10.1017/S1477200006002179

[1]

[2]

[3]