O concello de Piteå está situado na parte sur do condado de Norrbotten, na desembocadura do río Pite na baía de Botnia. A economía do concello é moi diferenciada e baséase na industria pesada básica.
Dende a súa fundación en 1971 a súa poboación medrou, e en 2024 o concello tiña 42 447 habitantes.[1]
A área do concello correspóndese á da parroquia de Piteå, onde coa reforma municipal de 1862 fundouse un concello rural co mesmo nome. Na zona estaba tamén a cidade de Piteå, na que en 1863 formouse un concello urbano. No ano 1916 separouse do concello rural de Piteå o concello rural de Norrfjärden, e en 1918 o de Hortlax.
A reforma municipal de 1952 non afectou ás divisións administrativas da zona, xa que nin os condado de Västerbotten nin o de Norrbotten se viron afectados pola reforma.
En 1967 incorporánronse á cidade de Piteå os concellos rurais de Piteå, Norrfjärden e Hortlax. O actual concello de Piteå formouse coa reforma municipal de 1971 a través da reorganización da cidade de Piteå.[2]
O municipio solicitou en 2024 ser incluído na Área Administrativa da lingua Saami.[3]
O municipio ten moitas áreas naturais. A zona de costa está formada por unha chaira cun extenso arquipélago que se estende en zonas pouco profundas. A superficie cha do leito rochoso está cuberta sobre todo de morena, moldeada polo levantamento tectónico. Os sedimentos da chaira costeira continúan cara os vales, que anteriormente estaban asolagados. Aquí os ríos foron erosionando sucos profundos con pendentes pronunciadas a medida que o terreo se levantaba. Sobre as partes máis escarpadas das ladeiras dos vales esténdese un terreo montañoso e accidentado, cuberto de bosque de coníferas e morena. Hai lagos e turbeiras nos vales alongados que atravesan o terreo montañoso e que se estenden dirección noroeste-sueste.
En total hai 212 lagos, cursos de auga e masas de auga costeira no municipio de Piteå.[4] Entre eles destacan o Bänkerträsket, un gran lago de 705 hectáreas, e o Flakaträsket, situado ao oeste da localidade de Koler.
