Mora é un concello sueco no condado de Dalarna.[1] A súa capital é a localidade de Mora. No mes de decembro de 2024 vivían no municipio 20 540 persoas.[2]
No concello de Mora a actividade económica caracterízase por unha gran tradición fabril e turística. O municipio ten unha longa historia de traballos co metal, a carpintería e a talla, con teares, mobles, kyrkbåtar (pequenas embarcacións de remos) e cabalos Dalarna como exemplos típicos da artesanía local. Produtos de Mora, como coitelos, billas e cabalos de Dalarna, son obxectos comúns nas casas suecas e representan a forte tradición emprendedora do concello. A actividade económica inclue tamén a empresas innovadoras, como Next Green, que fabrica estacións de carga para coches eléctricos. A vida natural e cultural do municipio atrae turistas e creou unha industria turística con moitas empresas do sector.
A área do concello correspóndese coa das parroquias de Mora, Sollerön, Venjan e Våmhus. Nelas fundáronse concellos rurais co mesmo nome coa reforma municipal de 1862.
A localidade municipal de Morastrand estableceuse o 8 de outubro de 1893 e disolveuse en 1908 cando se formou o köping de Morastrand a través dunha excisión do municipio rural de Mora.
A reforma municipal de 1952 non afectou a ningunha división da zona.En 1959 o concello rural de Mora incorporouse ao köping que ao mesmo tempo pasou a chamarse Mora köping.
O concello de Mora fundouse coa reforma municipal de 1971 a partir do köping e dos municipios rurais de Sollerön, Våmhus e Venjan.[3]
O concello atópase no centro de Dalarna e limita ao leste co municipio de Rättvik, ao sueste co de Leksand, ao sur co de Vansbro, ao oeste co de Malung-Sälen, ao noroeste co de Älvdalen e ao norte co concello de Härjedalen.
