A Cruz da Liberdade e a Columna da Vitoria da Guerra de Independencia (en estoniano: Vabadussõja võidusammas) é un monumento que se atopa na praza da Liberdade, en Talín, Estonia. Foi inaugurada o 23 de xuño de 2009 como monumento conmemorativo para os caídos durante a guerra de independencia de Estonia. A columna mide 23,5 m de altura e consta de 143 placas de vidro. O monumento incorpora a Cruz da Liberdade, a condecoración máis distinguida de Estonia estabelecida en 1919.
A idea de crear un monumento xurdiu en 1919, antes de rematar a guerra. Durante a Guerra da Independencia en 1918–1920, 4.000 persoas morreron e 14.000 resultaron feridas no bando de Estonia.[1] En 1936 aprobouse unha lei para estabelecer un monumento nacional en conmemoración da guerra. Os traballos preparatorios foron interrompidos pola segunda guerra mundial e a posterior ocupación soviética. Despois de que Estonia recuperase a independencia en 1991, volveuse a propoñer a cuestión de estabelecer un monumento nacional para a conmemoración da guerra da independencia. Na primavera de 2005, o Riigikogu decidiu que se erixiría unha columna de vitoria en memoria da Guerra na Praza da Liberdade en Talín. En 2006, un concurso de deseño do monumento recibiu máis de 40 inscricións. A obra gañadora "Libertas" foi deseñada por Rainer Sternfeld, Andri Laidre, Kadri Kiho e Anto Savi. Celander Ehitus OÜ foi seleccionado como o principal construtor.
