A calaverita ou telurio de ouro, é un mineral metálico. A súa composición química presenta a fórmula AuTe2, de masa molecular 452,2 u e un contido de 56,44% de telurio e un 43,56% de ouro. Preséntase con estrutura cristalina monoclínica, opaca, fractura concoidal, con dureza entre 2,5 e 3,0. É un dos poucos compostos dos que pode obterse ouro e telurio.
Foi descuberto por primeira vez no condado de Calaveras, no estado norteamericano de California, en 1861, de aí o seu nome. A cor pode variar desde un branco prateado a un amarelo lácteo. O principal mineral asociado é a silvanita. As principais reservas deste mineral atópanse nos Estados Unidos (Colorado e California), Romanía (Nagyag), Canadá (Ontario e Quebec) e en Australia (Kalgoorlie).
