Caixa CAAT

Na Galipedia, a Wikipedia en galego.

En bioloxía molecular unha caixa CAAT, tamén chamada caixa CCAAT, é un determinado patrón na secuencia de nucleótidos do ADN eucariótico coa secuencia consenso 3'-GGCCAATCT-5' (no sentido de transcrición na cadea molde do ADN). A caixa CAAT sinala o sitio onde se debe unir un factor de transcrición, e está tipicamente acompañada dunha secuencia consenso conservada. Un destes factores é o CBF (factor de unión á caixa CAAT, CAAT-box binding factor).[1] A caixa está situada xeralmente a 75-80 bases augas arriba do sitio de inicio da transcrición, pero en promotores de clase II de eucariotas superiores está situado a 50-100 nucleótidos do sitio de inicio da transcrición.[2]

Transcrición[editar | editar a fonte]

Nos xenes que presentan este elemento parece que este é necesario para que o xene se transcriba en cantidade suficiente. A caixa está con frecuencia ausente en xenes que codifican proteínas que se usan en practicamente todas as células. Esta caixa, xunto coa caixa GC, coñécese porque a ela se unen factores de transcrición xeral. As proteínas específicas que cómpren para unirse e activar a caixa CAAT, denomínanse proteínas de unión á caixa CAAT (ou CCAAT) ou factores de unión á caixa CAAT. Nos animais o factor CBF necesita un alto nivel de conservación da secuencia no motivo CCAAT, e as secuencias que o rodean contribúen á especificidade da unión.[2]

A caixa CAAT está sempre situada augas arriba da caixa TATA, e estas dúas secuencias consenso pertencen á rexión promotora reguladora. A expresión xénica plena ocorre cando proteínas activadoras da transcrición se unen a cada módulo da rexión promotora reguladora.

Distribución[editar | editar a fonte]

As caixas CAAT encóntranse con frecuencia en eucariotas, pero non en procariotas. Análises informáticos de 502 rexións promotoras da ARN polimerase II atoparon que un 30% dos promotores contiñan unha secuencia CCAAT (ou ATTGG na cadea complementaria)[1]

Notas[editar | editar a fonte]

  1. 1,0 1,1 Weimin Bi, Ling Wu, Françoise Coustry, Benoit de Crombrugghe and Sankar N. Maity (1997). "DNA Binding Specificity of the CCAAT-binding Factor CBF/NF-Y". The Journal of Biological Chemistry 272 (42): 26562–72. doi:10.1074/jbc.272.42.26562. Consultado o 2013-12-29. 
  2. 2,0 2,1 Victor Kusnetsov, Martin Landsberger, Jörg Meurer and Ralf Oelmüller (1999). "The Assembly of the CAAT-box Binding Complex at a Photosynthesis Gene Promoter Is Regulated by Light, Cytokinin, and the Stage of the Plastids". The Journal of Biological Chemistry 274 (50): 36009–14. doi:10.1074/jbc.274.50.36009. Consultado o 2013-12-29. 

Véxase tamén[editar | editar a fonte]

Outros artigos[editar | editar a fonte]