Bobby Seale

Na Galipedia, a Wikipedia en galego.
Bobby Seale
Nacemento22 de outubro de 1936
Lugar de nacementoDallas
NacionalidadeEstados Unidos de América
Alma máterMerritt College e Berkeley High School
Ocupaciónactivista político, profesor universitario, político, autobiógrafo e Activista polos dereitos humanos
editar datos en Wikidata ]

Bobby Seale, nado en Dallas, Texas, o 22 de outubro de 1936,[1][2][3] é un político afroamericano estadounidense, cofundador no ano 1966 do Partido Pantera Negras xunto con Dr. Huey P. Newton e David Hilliard.

Traxectoria[editar | editar a fonte]

Militante dende os seus anos de instituto en asociacións afroamericanas, Seale consegue formar un movemento que chegou a ter máis de 5000 membros e do que ocupou tarefas de dirección. Por tal causa estivo no punto de mira do FBI e foi un dos Oito de Chicago acusado de conspiración e incitación á violencia na Convención Nacional Democrática de 1968. Foi sentenciado a catro anos de prisión por desacato ao tribunal, debido aos seus frecuentes ataques de ira durante o xuízo. Nun deses ataques o xuíz chegou a ordenar que o atasen e amordazasen.

Seale foi acusado tamén nos xuízos de New Haven en 1970 polo asasinato de Alex Rackley, xuízo que rematou como nulo ao ser incapaz o xurado de chegar a un acordo. Os xuízos son considerados como un exemplo de represión política até por persoeiros moderados, e foron acompañados de protestas en New Haven que coincidiron coa folga de estudantes de maio dese mesmo ano.

No ano 1974 presentouse á alcaldía de Oakland (California), ficando en segundo lugar. Apartir de aí o seu activismo político reduciuse á participación en diversas asociacións pacifistas. No ano 2002, tras anos retirado da vida pública, Seale comezou a colaborar con Reach!, un grupo de apoio á educación de mozos e mozas.

Obra[editar | editar a fonte]

É autor de dous libros onde narra as súas experiencias políticas:

  • Seize the Time: The Story of the Black Panther Party and Huey P. Newton, de 1970
  • A Lonely Rage - The Autobiography of Bobby Seale, de 1978.

Notas[editar | editar a fonte]

  1. "Pennsylvania Center for the Book". Arquivado dende o orixinal o 11 de xuño de 2010. Consultado o 16 de novembro de 2009. 
  2. Barbara Bigelow Contemporary Black Biography: Profiles from the International Black Community, volume 3. Gale Research, 1992, páxina 221
  3. David De Leon Leaders from the 1960s: A Biographical Sourcebook of American Activism. Greenwood Publishing Group, 1994, páxina 149