Beverly Crawford

Beverly Crawford
Data nacemento	31 de agosto de 1963 (60 anos)
Nado en	Gainesville, Florida, Estados Unidos
Ocupación	Cantante, co-pastora do Gainesville Family Worship Center (Gainesville, Florida)
Xénero	Gospel
Instrumento(s)	Voz
Selo(s) discográfico(s)	Warner Alliance Records, Chordant, Rhino, JDI Records
Relacionado con	Camp Sisters; New Life Singers
Na rede
	https://twitter.com/beverlycrawford
	[ editar datos en Wikidata ]

Beverly Crawford, nada en Gainesville, Florida, o 31 de agosto de 1963, é unha cantante afroamericana estadounidense de gospel, mellor coñecida por cantar co grupo New Life Singers no programa Bobby Jones Gospel na cadea Black Entertainment Television (BET), e polas súas interpretacións de temas como "Praise Jehovah", "Run to the Water", "He's Done Enough" e "It's About Time For A Miracle".

Infancia e xuventude[editar | editar a fonte]

Beverly Crawford é un dos sete fillos do bispo Bishop Walter Camps e a súa muller. Comezou a cantar á idade de tres anos e formou parte coas súas irmás do conxunto Camp Sisters.

Carreira musical[editar | editar a fonte]

A finais da década de 1980, o seu marido, Todd Crawford, gravou un vídeo caseiro con ela e as súas irmás cantando e enviou copias a unhas cantas produtoras de gospel, respondendo unicamente Bobby Jones Gospel. Estando impresionado coas irmás, Bobby Jones invitounas a cantar no seu programa de entretemento e, despois dun par de visitas, invitou a Beverly a ingresar no seu grupo, New Life Singers.

Beverly permaneceu no programa durante seis anos, sendo a favorita do público cada semana. A cúa carreira en solitario deu comezo en 1995 coa gravación de "Jesus, Precious King" en Warner Alliance Records (un selo discográfico que xa non existe), ao que seguiu tres anos despois "Now That I'm Here", que incluíu o exitoso tema "Just As Soon (I'll Be Shouting)". Este álbum foi nomeado aos Grammy de 1999.

En 2001, Crawford gravou o álbum de estudio (excepto por un tema en directo) titulado "Beverly" en Dexterity Records (o selo discográfico do ministro o bispo T.D. Jakes) e en 2003 volveu ao directo gravado nunha igrexa con "Live Family and Friends", que incluíu os temas "Higher in the Lord" e "Hold On", nos que contou coa colaboración nas voces de Bobby Jones, Shirley Murdock, Melvin Williams (dos The Williams Brothers) e a súa filla Latrina Crawford.

En 2007 gravou o seu quinto traballo, "Live from Los Angeles", no selo de Os Ánxeles (California) JDI label, que contiña o éxito de número un "He's Done Enough". A canción estivo no top ten das listaxes durante máis dun ano.

En xaneiro de 2009, Crawford acadou o seu primeiro Stellar Gospel Music Award, co premio á "Vocalista Feminina Tradicional do Ano" pola súa álbum do 2007.

O 19 de setembro de 2009 gravou o seu segundo álbum con JDI, un directo gravado na igrexa de Faithful Central, nos Ánxeles. Foi titulado "Live from Los Angeles - Volume 2"^[2] e contou con varias colaboracións, incluíndo a de Shirley Murdock. Foi editado o 14 de setembro de 2010 e contivo o sinxelo de éxito "It's About Time for a Miracle". En 2012 gañou o seu segundo Stellar Gospel Music Award como "Vocalista Feminina Tradicional do Ano" por este traballo.

En maio de 2014 editou un novo álbum, chamado "Thank You For All You've Done"^[3], outra vez con JDI. Entrou co número un na listaxe de Gospel Music Billboard Charts, e contén o éxito "Sweeping Through The City".

Vida persoal[editar | editar a fonte]

Está casada co pastor Todd Crawford, co que ten unha filla (Latrina) e un fillo (Todd Jr.). Os Crawford son co-pastores do Gainesville Family Worship Center, en Gainesville, pertencentes á Igrexa de Deus en Cristo, unha agrupación pentecostalista.