Bembibre, Viana do Bolo
| Bembibre | |
|---|---|
 Igrexa parroquial | |
| Concello | Viana do Bolo[1] |
| Provincia | Ourense |
| Coordenadas | 42°08′17″N 7°08′26″O / 42.138180555556, -7.1405555555556Coordenadas: 42°08′17″N 7°08′26″O / 42.138180555556, -7.1405555555556 |
| Poboación | 62 hab. (2015) |
| Entidades de poboación | 1[1] |
| [ editar datos en Wikidata ] | |
Santo André de Bembibre é unha parroquia do concello de Viana do Bolo na comarca de Viana, na provincia de Ourense. Segundo o IGE[2], en 2015 tiña 62 habitantes (35 homes e 27 mulleres).
Historia e patrimonio[editar | editar a fonte]
En Bembibre está o castro de Vila de Sen. Alí atopouse unha figura antropomórfica, e mais a cabeza dun verrón, que se conserva no Museo Arqueolóxico de Ourense[3]. Na baixa idade media construíuse nese lugar un pequeno mosteiro beneditino, e no século XIV Sancho IV de Castela cedeu o mosteiro e mais os seus terreos á diocese de Astorga, á que segue pertencendo a parroquia[4].
Balneario de Bembibre[editar | editar a fonte]
Preto da aldea hai un balneario de augas sulfurosas frías, construído en 1896.[5] As propiedades das súas augas aparecen xa citadas na obra Espejo cristalino de las aguas de España de Alfonso Limón Montero (1697), no Diccionario geográfico-estadístico-histórico de España y sus posesiones de Ultramar de Pascual de Madoz (1845) e en Hidrología médica de Galicia de Nicolás Taboada Leal (1877). Ao parecer, en 1894 o doutor de Viana do Bolo José Manuel Armesto López adquiriu os terreos e construíu o balneario, inaugurado en 1896. Tempo despois construíuse un hotel de dous andares, e outro edificio para tratar os doentes con auga quente a presión. En 1924 o balneario aparece citado no Anuario-Guía de las playas y balnearios de España, e en 1936 Vicente Risco cítao en Geografía del Reino de Galicia. O balneario pechou en 1956[6]
As augas subterráneas saen a 15 °C[7] e teñen unha forte mineralización, moi osixenada. Son augas bicarbonatadas (fluorada), sódicas, con boro e arsénico.
Igrexa de Santo André[editar | editar a fonte]
A igrexa parroquial é matriz da de Santa María de Pradocabalos. Na fachada principal ten unha fornela barroca baleira, enmarcada nunha moldura lobulada. No interior ten volutas e altorrelevos con motivos florais e dous leóns rampantes afrontados. Na parte superior hai unha elegante espadana de dous corpos decorada nos seus laterais por volutas e pináculos.
No interior do templo hai unha pía bautismal decorada cun avieirado, e varias imaxes de André o Apóstolo, coa cruz de Santo André. O arco triunfal é de feitura academicista, e hai tres retablos barrocos, o principal dourado e entallado con motivos florais e xeométricos.
No muro leste, na ábsida, hai varios esgrafiados.
Lugares e parroquias[editar | editar a fonte]
Lugares de Bembibre[editar | editar a fonte]
| Lugares da parroquia de Bembibre no concello de Viana do Bolo (Ourense) | |
|---|---|
Parroquias de Viana do Bolo[editar | editar a fonte]
Notas[editar | editar a fonte]
- ↑ 1,0 1,1 Decreto 332/1996, do 26 de xullo, polo que se aproba o nomenclátor correspondente ás entidades de poboación da Provincia de Orense.
- ↑ IGE (ed.). "IGE - Nomenclátor de Galicia" (en galego). Arquivado dende o orixinal o 30 de decembro de 2020. Consultado o 30 de abril de 2021.
- ↑ "Peza do mes: Cabeza dun Verrón" (PDF). Museo Arqueolóxico de Ourense. Febreiro 2003.
- ↑ "Igrexa de Santo André de Bembibre". Concello de Viana do Bolo.
- ↑ "O Balneario de Bembibre". Concello de Viana do Bolo.
- ↑ Ramírez Ortega, A.; Rial Lemos, M. E.; Ramírez Masferre, J.-Á. (2000). "El patrimonio hidromineral de la Comunidad Autónoma de Galicia". En López Geta, J. A.; Pinuaga Espejel, J. L. Panorama actual de las Aguas Minerales y Minero-medicinales en España. Instituto Geológico y Minero de España. p. 355.
- ↑ David Simón-Lorda (6 de novembro de 2011). "Médicos vianeses y frieireses a la sombra de un castaño centenario: Noticias del "Castiñeiro de Bembibre" (Viana do Bolo-Ourense)". Diario de un médico de guardia (en castelán).
Véxase tamén[editar | editar a fonte]
Outros artigos[editar | editar a fonte]
| Control de autoridades |
|
|---|
