Beauty and the Beast (filme de 2017)

Para outras páxinas con títulos homónimos véxase: A Bela e a Besta (homónimos).

Beauty and the Beast
Ficha técnica
Director	Bill Condon
Produtor	David Hoberman Todd Lieberman
Guión	Stephen Chbosky Evan Spiliotopoulos
Baseado en	Beauty and the Beast de Linda Woolverton A Bela e a Besta de Jeanne-Marie Leprince de Beaumont
Intérpretes	Emma Watson Dan Stevens Luke Evans Kevin Kline Josh Gad Ewan McGregor Stanley Tucci Audra McDonald Gugu Mbatha-Raw Ian McKellen Emma Thompson
Música	Alan Menken
Son	Adam Kirley
Fotografía	Tobias A. Schliessler
Montaxe	Virginia Katz
Estudio	Walt Disney Pictures Castle Rock Entertainment
Distribuidora	Walt Disney Studios Motion Pictures
Estrea	17 de marzo de 2017 Estados Unidos
Duración	129 minutos
Orixe	Estados Unidos Reino Unido
Xénero	aventuras, fantasía
Orzamento	160 millóns de $
Recadación	por confirmar
Filme anterior	Pete's Dragon
Filme seguinte	por confirmar
Na rede
http://movies.disney.com/beauty-and-the-beast-2017

Beauty and the Beast é un filme estadounidense de fantasía dirixido por Bill Condon e escrito por Evan Spiliotopoulos e Stephen Chbosky, baseado no conto de fadas do mesmo nome de Jeanne-Marie Leprince de Beaumont. É unha adpatación en imaxe real do filme de debuxos animados (tamén da Disney) de 1991: Beauty and the Beast.

 Está protagonizado por Emma Watson, Dan Stevens, Luke Evans, Ewan McGregor, Ian McKellen, Emma Thompson, Kevin Kline, Josh Gad, Audra McDonald, Gugu Mbatha-Raw, Stanley Tucci e Bill Paxton. A fotografía principal comezou nos Estudios Shepperton de Londres o 18 de maio de 2015.

O filme estreouse o 17 de marzo de 2017 e a súa banda sonora inclúe cancións de artistas de renome como Celine Dion, John Legend e Ariana Grande.

Sinopse

Bela (Emma Watson) é unha moza brillante, fermosa, e independente que é prendida por unha Besta (Dan Stevens) no seu castelo en troco da liberdade do seu pai Maurice (Kevin Kline). Malia o medo que ten, Bela fai amizade co persoal encantado do castelo e aprende a ver máis aló do horríbel exterior da Besta para recoñecer o corazón amábel e a alma do verdadeiro príncipe humano que mora no seu interior. Mentres tanto, un cazador chamado Gastón (Luke Evans) pretende conquistar a Bela, polo que tenta cazar a Besta a calquera prezo.

Elenco

• Emma Watson como Bela.
• Dan Stevens como a Besta / O príncipe Adam.
• Luke Evans coma Gaston, un cazador e ex-soldado malvado e desapiadado, que procura casar con Bela.
• Ewan McGregor coma Lumière, o asistente real de Besta, que foi convertido nun candelabro.
• Ian McKellen como Din Don, o mordomo leal de Besta, que foi convertido nun reloxo de mesa.
• Emma Thompson como a Señora Potts, a asistente do castelo, que foi convertida nunha teteira.
• Kevin Kline como Maurice, o pai de Bela.
• Josh Gad como LeFou, o secuaz de Gastón.
• Audra McDonald como Madame de Garderobe, a cantante de ópera italiana do castelo, que foi convertida nun armario.
• Gugu Mbatha-Raw como Plumette, a coqueta criada do castelo e namorada de Lumière, que foi convertida nun plumeiro.
• Stanley Tucci como Mestre Cadenza, o compositor do castelo e home de Garderobe, que foi convertido nun clavicordio, é un personaxe orixinal creado para o filme.
• Henry Garrett como o Rei.
• Nathan Mack como Chip, o fillo da señora Potts, que foi convertido nunha cunca de té.
• Harriet Jones como a Raíña.
• Hattie Morahan como Agathe, a feiticeira que transformou o príncipe nunha besta pola súa arrogancia.
• Adrian Schiller como Monsieur d'Arque, o dono do manicomio local, a quen Gaston suborna para que o axude no seu plan de casar con Bela.
• Gerard Horan como Señor Potts.

Produción

O 4 de xuño de 2014, Bill Condon asinou un contrato para dirixir o remake con actores reais de carne e óso da orixinal animada A Bela e a Besta da Disney. O 26 de xaneiro de 2015, anunciouse que Emma Watson sería Bela, a princesa protagonista da película. Luke Evans estaba en conversacións para interpretar o papel do vilán Gastón, o cazador, o 4 de marzo de 2015, que foi confirmado polo tweet de Watson o 5 de marzo de 2015. Dan Stevens tamén estaba en negociacións para interpretar a Besta/o Príncipe Adam, o segundo protagonista da película o 4 de marzo de 2015. Stevens tamén foi confirmado por Watson o 5 de marzo de 2015. Josh Gad foi incluído no elenco o 13 de marzo de 2015 para interpretar a LeFou, o compañeiro de Gastón. Emma Thompson uniuse ao elenco o 16 de marzo de 2015 para interpretar a señora Potts e Kevin Kline para interpretar a Maurice, o pai de Bela. Audra McDonald foi incluída ao elenco como Garderobe, o armario, o 27 de marzo de 2015. Ian McKellen foi incluído o 10 de abril de 2015 para interpretar a Din Don, leal mordomo da Besta, que foi maldicido dentro do castelo e convertido nun reloxo. O 13 de abril de 2015, Gugu Mbatha-Raw confirmouse que interpretaría a Plumette, o plumeiro. O 21 de abril, anunciouse que Ewan McGregor se unira ao elenco como Lumière, o candelabro, e máis tarde ese mesmo día, que Stanley Tucci estaría a interpretar a Cadenza, o piano, que é un personaxe orixinal creado para a película.

Rodaxe

A fotografía principal comezou nos Estudios Shepperton de Londres o 18 de maio de 2015. A filmación cos principais actores concluíu o 21 de agosto de 2016. Seis días despois, o coprodutor Jack Morrisey confirmou que a película acabara oficialmente a produción.

Estrea

O 16 de marzo de 2015, a Disney anunciou que o filme se estrearía en 3D o 17 de marzo de 2017. A primeira presentación oficial do filme levouse a cabo en D23 Expo en agosto de 2015.

Promoción

Tras un anuncio o 22 de maio de 2016, a Disney estreou o primeiro teaser oficial o 23 de maio de 2016. Nas súas primeiras 24 horas, o tráiler alcanzou 91,8 millóns de visitas, o que superou o número de visitas nesa cantidade de tempo na historia, incluíndo para os resumos doutras películas distribuídas pola Disney coma Star Wars: The Force Awakens, Captain America: Civil War e Avengers: Age of Ultron. O primeiro cartel promocional foi lanzado o 7 de xullo de 2016. O 2 de novembro de 2016, Entertainment Weekly mostrou a primeira imaxe oficial na portada da súa revista desa semana xunto con nove fotos novas tamén. Unha semana despois, Emma Watson e a Disney publicaron un novo póster para a película. Durante o programa de Good Morning America, o 14 de novembro do 2016 estreouse o tráiler oficial do filme. O tráiler alcanzou 127,6 millóns de visitas nas súas primeiras 24 horas, establecendo unha nova marca como o tráiler con máis vistas nun día, superando a Fifty Shades Darker. Con todo, a marca foi rota de novo por The Fate of the Furious. Un anuncio de televisión con Watson cantando mostrouse durante a 74ª Entrega dos Premios Globos de Ouro. A Disney lanzou o tráiler final o 30 de xaneiro de 2017.

Controversia

Nesta versión do filme, LeFou (interpretado por Gad) é homosexual, marcando o primeiro e único personaxe abertamente homosexual dunha película da Disney. A decisión de inclusión foi recibida con eloxios pola crítica. O goberno ruso considerou a prohibición da película no país, porén finalmente decidiu que calquera persoa menor de 16 anos entraría nos cines sempre con acompañantes adultos. Ademais, un cine en Henagar, Alabama non proxectará a película debido á subtrama. En Malaisia, postergouse o lanzamento en espera dunha “revisión interna”, xa que a censura da película de Malaisia esixe que se elimine dita escena. Así mesmo, neste país foi cualificada para maiores de 13 anos.

Ante estas críticas, os propios actores que protagonizaron o filme, pronunciáronse respecto disto. Ewan McGregor, que interpreta Lumière, declaraba o seguinte: "Se vives preto de Alabama non deberías ir ver esta película. Que pensaría Xesús?". Por outra banda, Josh Gad, que caracteriza a LeFou, afirmou durante a estrea da película nos Ánxeles: "Bill Condon fixo un traballo incríbel ao darnos a oportunidade de crear unha versión de LeFou que non é como a orixinal ... pero que o fai máis humano e en certa medida un personaxe marabillosamente complexo".

Véxase tamén

Ligazóns externas

• Beauty and the Beast na IMDb (en inglés).
• A bela e a besta en FilmAffinity.
• A bela e a besta en Rotten Tomatoes (en inglés).
• A bela e a besta en Tomatazos
• A bela e a besta en Box Office Mollo (en inglés).
• Tráiler en 20minutos.