Avelino López Otero
  | |
| Biografía | |
|---|---|
| Nacemento | 1903 Acevedo, España |
| Morte | 25 de setembro de 1936 (32/33 anos) Lugo, España |
| Causa da morte | homicidio, tortura |
| Actividade | |
| Ocupación | político, xornalista |
| Familia | |
| Irmáns | César López Otero |
  | |
Avelino López Otero, nado en Acevedo (San Xurxo de Piquín, concello de Ribeira de Piquín; por entón do concello de Meira), en 1903 e finado en Lugo o 25 de setembro de 1936, foi un xornalista e político galego.
Traxectoria
[editar | editar a fonte]
Licenciouse en dereito e tras emigrar durante un tempo a Cuba instalouse na Coruña, onde foi correspondente de El Pueblo Gallego, dirixiu en Lugo o semanario republicano Guión (1930), no que colaboraron importantes políticos republicanos de Lugo e intelectuais e literatos de toda Galicia. Membro da masonería, traballou como secretario do seu irmán, o político César López Otero e con el foi o promotor da constitución do concello de Ribeira de Piquín, constituído o 5 de marzo de 1935. Avelino formou parte da comisión de técnicos que redactou o anteproxecto do Estatuto de Autonomía para a Asemblea que convocara o concello de Santiago de Compostela en 1932 e que constituíu a versión definitiva do estatuto que se plebiscitou en 1936. Despois de pertencer á Organización Republicana Gallega Autónoma e á Federación Republicana Gallega, foi secretario xeral do Partido Republicano Gallego entre 1933 e 1934, ata que se integrou en Izquierda Republicana. En 1933 figuraba como director de Tierra Gallega.[1]
Detido a raíz do golpe de Estado do 18 de xullo de 1936, morreu no Hospital de Lugo, onde fora trasladado o 17 de setembro dende a prisión de Lugo a consecuencia das feridas das malleiras.
Notas
[editar | editar a fonte]- ↑ Faro Villalbés, 11-2-1933, p. 3.
Véxase tamén
[editar | editar a fonte]Bibliografía
[editar | editar a fonte]- Souto Blanco, María Jesús (1998). La represión franquista en la provincia de Lugo (1938-1940). Sada: Ediciós do Castro. ISBN 84-7492-891-5.
