Auguste Patey

Auguste Patey

Nome orixinal	Henri-Auguste-Jules Patey
Biografía
Nacemento	9 de setembro de 1855. París, Francia.
Morte	16 de maio de 1930 (74 anos) París, Francia.
Cargos
Gravador xeral de moedas de Francia
Período	1930 – 1896
Antecesor	Jean Lagrange.
Sucesor	Lucien Bazor
Datos persoais
País de nacionalidade	Francés.
Educación	Escola Nacional Superior de Belas Artes
Actividade
Ocupación	Escultor, medallista e deseñador de moedas.
Empregador	Monnaie de Paris.
Membro de	Academia de Belas Artes de París. Instituto de Francia.
Profesores	Henri Chapu, François Jouffroy e Jules Clément Chaplain
Alumnos	Louis Charles Muller e Léon Georges Baudry
Influencias	Oscar Roty, Jules Chaplain.
Familia
Cónxuxe	Louise Gabrielle Julie Cœur de Vache.
Pais	Jacques Jerome Exavier Patey   e Marie Rose Bonne Delaport.
Premios
1875: 2º Premio de Roma. 1881: 2º Premio de Roma. 1898: Cabaleiro da Lexión de Honra.
Lista (19 de febreiro de 1919)  oficial da Lexión de Honra (27 de maio de 1898)  cabaleiro da Lexión de Honra
Marca de Patey como gravador xeral de moedas

Henry Auguste Jules Patey, coñecido como Auguste Patey, nado en París o 9 de setembro de 1855 e finado na mesma cidade o 16 de maio de 1930, foi un escultor, medallista e deseñador de moedas francés, que exerceu o cargo de gravador xeral de moedas de Francia entre 1896 e 1930.

Traxectoria

Primeiros anos e formación

Auguste Patey naceu en París o 9 de setembro de 1855, fillo de Marie Rose Bonne Delaporte e do escultor en pedra Jacques Jerome Exavier Patey.

Logo de se formar co escultor Henri Chapu, e máis tarde en gravado de medallas con Jules Clément Chaplain, en 1873 ingresou na Escola Nacional Superior de Belas Artes de París, onte estudou no taller de François Jouffroy.

Traxectoria artística e profesional

Logo de acadar o segundo premio en 1875, en 1881 acadou o primeiro Premio de Roma, o que levou aparellada unha posterior estadía como bolseiro na Villa Médicis de Roma, entre 1882 e 1884.

En 1877 comezou a expor no Salón de París e nos anos seguintes mantívose fiel a esta cita, na que foi expondo anualmente as súas medallas e as súas obras de escultura. No Salón foi premiado en varias ocasións, e na convocatoria de 1894 acadou a medalla de primeira clase; na Exposición Universal de 1889 o xurado concedeulle unha medalla de bronce, e na Exposición Universal de París de 1900 a medalla de ouro. Do mesmo xeito, durante eses anos participou coas súas medallas nos certames convocados para as principais exposicións internacionais, como as celebradas en Barcelona, Anveres, Lión, Bruxelas e Hanoi, entre outras.

Baixorrelevo cun retrato de Louis Pasteur (1895).

Patey foi nomeado o 22 de abril de 1896 como gravador xeral de moedas de Francia, en substitución de Jean Lagrange, cargo que ocupou ata o seu falecemento en 1930. Durante o seu exercicio, escolleu como marca distintiva un facho, que adoita aparecer en todas as moedas emitidas pola Monnaie de Paris durante ese período.

Nas moedas creadas por el utilizou a abreviatura "A. PATEY" como marca de gravador. Ademais de ser o autor de varias moedas circulantes en Francia, Patey foi autor de numerosas moedas para outros estados e territorios, a maioría deles de soberanía ou de influencia francesa (Camerún, as illas Comores, a illa Guadalupe, a Indochina francesa, Irán, Iugoslavia, o Líbano, Siria, Tailandia, Togo e Tunisia).

Ademais das moedas, Augusto Patey foi autor dun bo número de medallas e de plaquetas en bronce. Por outra banda, a Patey débeselle tamén a creación de diversas obras escultóricas, entre as que cabe salientar un busto de M. Henri Dubois (1877), unha estatua xacente de Mademoiselle Roty no cemiterio de Montparnasse (1895) ou un medallón dedicado a Pasteur (1896).

“

A arte de Augusto Patey ten a súa orixe en Jules Clément Chaplain e en Oscar Roty, combinando a plenitude do primeiro coa delicadeza do segundo — L. Benedite (1899).

”

Auguste Patey foi elixido o 11 de xaneiro de 1913 como membro titular na sección de Gravado da Academia de Belas Artes, do Instituto de Francia, e anteriormente fora nomeado Cabaleiro da Lexión de Honra, o 15 de xuño de 1898.

Entre 1913 e 1926, exerceu a docencia como profesor e xefe de taller na Escola Nacional Superior de Belas Artes de París.

Vida persoal

Auguste Patey casou o 16 de setembro de 1898 en París con Louise Gabrielle Julie Cœur de Vache, e non se lle coñece descendencia.

Patey finou en París o 16 de maio de 1930.

Escolma de moedas

• 
  25 cents (1905). Francia.
• 
  Proba non adoptada dun Franco (1903). Francia.
• 
  5 santimat (1891]. Illas Comores.
• 
  5 cents (1938). Indochina francesa.
• 
  1 franco (1903). Guadalupe.
• 
  1 franco (1924). Camerún.
• 
  2 piastras (1924). Líbano.
• 
  ½ piastra (1921). Siria.
• 
  1 baht (1908). Tailandia.
• 
  5 centimes (1918). Tunisia.
• 
  50 para (1921). Iugoslavia.

Véxase tamén

Bibliografía

• "Auguste Patey". En Qui êtes-vous? Annuaire des contemporains; notices biographiques. G. Ruffy, París. 1924. Páxina 589.
• Forrer, L. (1912). "Patey, Henri Auguste Jules". En Biographical Dictionary of Medallists. Vol V. Spink & Son, Londres. Páxinas 422-428.
• Forrer, L. (1930). "Patey, Henri Auguste Jules". En Biographical Dictionary of Medallists. Vol. VIII (Supl. 2). Spink & Son, Londres. Páxina 115.
• Mazerolle, F. (1898). "Auguste Patey. Biographie et catalogue de son œuvre". En Gazette numismatique française. París.Páxinas 217-225.
• Simon, L. et al. (1930). "Discours aux funérailles d'Auguste Patey". En Publications de l’Institut de France. N° 9.
• Widor, C.-M. (1930). Notice sur Auguste Patey: la gravure, la monnaie, les médailles. Institut de France, Académie des Beaux-Arts, París.

Outros artigos

• Gravador xeral de moedas de Francia
• Monnaie de Paris

Predecesor: Jean Lagrange

Gravador xeral de moedas de Francia 1896 - 1930

Sucesor: Lucien Bazor