Arlington Heights, Illinois

Coordenadas: 42°5′42″N 87°58′51″O / 42.09500, -87.98083

Evergreen Avenue, no centro da cidade de Arlington Heights

Á esquerda, localización de Arlington Heights no condado de Cook; a dereita, a deste condado en Illinois

Arlington Heights é unha cidade e municipio dos Estados Unidos, a cabalo dos condados de Cook, e de Lake no estado de Illinois.

Xeografía[editar | editar a fonte]

É un suburbio de Chicago, atopándose a uns 40 km ao noroeste do centro desta cidade.^[1]

O municipio ocupa unha superficie de 43,09 km².^[2]

Segundo o censo de 2019 Arlington Heights contaba cunha poboación de 74 760 habitantes,^[3] polo que a súa densidade de poboación, nese ano, era de 1 738,30 Hab./km².

Historia[editar | editar a fonte]

A mediados do século XIX a localidade de Arlington Heights estaba principalmente na parte occidental do municipio de Wheeling, con territorios nos concellos adxacentes de Elk Grove e Palatine, nunha zona que orixinalmente destacaba pola ausencia de soutos e árbores.

A Oficina Xeral de Terras comezou a vender leiras alí en 1835. En 1853, William Dunton, orixinario de Oswego, Nova York, convenceu ao ferrocarril de Illinois e Wisconsin para que fixera unha estación no lugar, e asentou unha cidade chamada Dunton, que recibiu o nome de William Dunton.

En 1850 a zona cambiou en gran medida a súa composición étnica, xa que moitos agricultores alemáns de Saxonia chegaran durante a década de 1840. John Klehm podería servir como exemplo: nun principio foi un cultivador de patacas, abastecendo o mercado de Chicago e, en 1856, comezou cun viveiro de cerdeiras, maceiras e pereiras, para despois cambiar aos abetos, aos arces e aos olmos, e despois ás flores. A finais da década de 1850, a zona fíxose famosa polas súas granxas, que enviaban produtos lácteos e vexetais a Chicago por ferrocarril.

A pequena cidade foi medrando aos poucos, establecéndose nela un ferreiro, unha queixaría, unha ferretaría e un hotel. Denominouse Arlington Heights en 1887, cando a súa poboación era duns 1 000 habitantes. A maioría eran agricultores, pero a eles uníronse outros homes que traballaban en Chicago, xa que Arlington Heights era un suburbio da cidade.