Arenicólidos

Arenicolidae
Deposicións de area causadas por un Arenicola marina enterrado.
Clasificación científica
Reino: Animalia Filo: Annelida Clase: Polychaeta Subclase: Scolecida Orde: Capitellida Familia: Arenicolidae Johnston, 1835
Xéneros
Ver texto

Os arenicólidos (Arenicolidae) son unha familia de vermes anélidos mariños poliquetos. O máis coñecido deles é Arenicola marina, que é a miñoca de mar que se usa como isco para pescar, pero outras especies da familia son similares e pódeselles chamar tamén miñocas (ademais miñoca utilízase para designar as miñocas terrestres como Lumbricus terrestris e outras). As deposicións enroscadas de area que producen poden verse comunmente na praia en marea baixa. Os arenicólidos atópanse por todo o mundo, e a maioría viven en substratos areosos dentro de galerías que escavan. A maioría aliméntanse dos sedimentos, aproveitando os detritos e microorganismos que conteñen, pero algúns comen algas.

Descrición

Os arenicólidos caracterízanse polo seu corpo longo cilíndrico dividido en tres rexións. O prostomio non ten apéndices. Hai un ou dous segmentos anteriores sen sedas. As partes dorsais dos parápodos (os notópodos) están truncadas abruptamente e as partes ventrais (neurópodos) son toros alongados que forman marcas transversais nalgúns casos. As notosedas teñen unha función capilar ou actúan como membros, e as neurosedas son ganchos rostrados. Presentan branquias nalgúns dos parápodos nas rexións media ou posterior.

Agás o xénero Branchiomaldane, as miñocas mariñas desta familia non son fáciles de confundir con outros poliquetos. A súa rexa cutícula e a súa rexión branquial típica con penachos de branquias son característicos.

Xéneros

• Abarenicola Wells, 1959
• Arenicola Lamarck, 1801
• Arenicolides Mesnil, 1898
• Branchiomaldane Langerhans, 1881
• Clymenides
• Eruca
• Protocapitella

Véxase tamén

Outros artigos

• Arenicola marina
• Poliquetos