Aleida March

Na Galipedia, a Wikipedia en galego.
Saltar ata a navegación Saltar á procura
Aleida March
Chedriving.jpg
Nome completoAleida March Torres
Nacemento19 de outubro de 1936
 Santa Clara
NacionalidadeCuba
Ocupaciónpolítica
CónxuxeChe Guevara
FillosAleida Guevara March
editar datos en Wikidata ]
Aleida March xunto a Ernesto Che Guevara

Aleida March (n. 1936) é unha muller cubana coñecida principalmente por ser a segunda muller de Ernesto Che Guevara. Preside o Centro de Estudos Che Guevara e é titular dos dereitos de autor dos escritos deste, entre eles varios textos aínda inéditos.

Biografía[editar | editar a fonte]

Aleida March naceu e medrou nunha finca de 20 hectáreas, propiedade do seu pai, na zona rural de Santa Clara. Integraba unha familia de campesiños brancos pobres, socialmente levemente diferenciados dos guajiros, ou campesiños negros, máis pobres aínda.

De nova foi estudar Pedagoxía á Universidade de Santa Clara. Comezou a interesarse pola política cando Fidel Castro levou adiante o ataque ó Cuartel Moncada en 1953. Vinculouse e ingresou no Movemento 26 de xullo, a partir de 1956.

Iniciada a guerra civil en 1957 Aleida militou na clandestinidade activamente para o M-26-7 como mensaxeira do responsable de Villa Clara, con fama de audaz e valente. Lolita Rossell, a súa amiga íntima e tamén militante do M-26-7 naquela época di dela: "Non tiña medo a nada. Era moi abnegada, seria, solteira e non tiña afección ás festas e esa clase de cousas".

As ideas de Aleida, coma moitos dos militantes do M-26-7 "del llano" estaban marcadas pola súa oposición frontal á ditadura de Fulgencio Batista e o desexo de establecer unha democracia liberal.

Coñeceu ó Che Guevara en plena guerra civil cando este chegou coa Columna Oito a combater á rexión, en outubro de 1958. Namoráronse nese momento e comezaron a convivir, a pesar de que Guevara estaba casado con Hilda Gadea e tiña unha filla.

Unha vez caída a ditadura de Batista o 1 de xaneiro de 1959 e tomado o poder o novo goberno, Hilda Gadea e a súa filla trasladáronse a Cuba, onde se divorciaron. Pouco despois Aleida March e Ernesto Guevara casaron o 9 de xuño de 1959, na Habana.

Xuntos tiveron catro fillos:

  • Aleida Guevara March, nada o 17 de novembro de 1960
  • Camilo Guevara March, nado o 20 de maio de 1962
  • Celia Guevara March, nada o 14 de xuño de 1963
  • Ernesto Guevara March, nado o 24 de febreiro de 1965

Aleida March preside o Centro de Estudos Che Guevara, ubicado na casa que compartiron na Habana.[1]

Curiosidades[editar | editar a fonte]

En agosto de 1961 Ernesto Guevara viaxou a Punta do Leste, Uruguay para representar a Cuba nunha reunión da OEA. Aproveitando a cercanía coa Arxentina, os seus familiares e amigos foron velo. Nesas circunstancias Jon Lee Anderson relata na súa biografía de Guevara o seguinte diálogo entre este e a súa querida "tía Beatriz".

"Nun determinado momento, dixo Figueroa, a tía Beatriz preguntou ó Che sobre a súa nova muller, Aleida. <<E unha moza de campo -dixo o Che-. Unha guajira>>. <<E iso que é?-preguntou Beatriz, perplexa- unha facendada?>>. O Che riuse a gargalladas: evidentemente a súa recoleta tía pensaba que se casara coa filla da aristocracia terratenente cubana".[2]

Notas[editar | editar a fonte]

  1. Anderson, Jon Lee (1997). Barcelona: Anagrama., ed. Che Guevara. Una vida revolucionaria. pp. 341–346. ISBN 8478882960. 
  2. Anderson, Jon Lee (1997). Barcelona: Anagrama., ed. Che Guevara. Una vida revolucionaria. p. 487. ISBN 8478882960. 

Véxase tamén[editar | editar a fonte]

Outros artigos[editar | editar a fonte]