Aimee Semple McPherson

Aimee Semple McPherson

Biografía
Nacemento	9 de outubro de 1890 Salford, Canadá (en)
Morte	27 de setembro de 1944 (53 anos) Oakland, Estados Unidos de América
Causa da morte	Sobredose
Lugar de sepultura	Forest Lawn Memorial Park
Datos persoais
País de nacionalidade	Canadá
Relixión	Pentecostalismo (pt)
Actividade
Ocupación	ministra , sacerdotisa , locutora de radio , escritora
Familia
Fillos	Rolf McPherson (en) , Roberta Semple Salter (en)

Aimee Semple McPherson, nada en Salford, Ontario, o 9 de outubro de 1890 e finada en Oakland, California, o 27 de setembro de 1944, tamén coñecida como «irmá Aimee» ou «irmá», foi unha evanxelista pentecostal canadense-estadounidense e unha celebridade dos medios moi influente durante os anos 1920 e 1930. Foi ademais a fundadora de The Foursquare Church. McPherson foi recoñecida como unha pioneira no uso dos medios de comunicación modernos, porque usou a radio para aproveitar o crecente atractivo do entretemento popular en América do Norte e incorporou outras formas nos seus sermóns semanais en Angelus Amorne, unha das primeiras megaigrexas.

Na súa época, foi a evanxelista protestante máis publicitada, superando a Billy Sunday e outros antecesores. Fixo demostracións públicas de sanación pola fe ante grandes multitudes; os testemuños informaron de decenas de miles de persoas sanadas. A articulación de McPherson sobre os Estados Unidos como unha nación fundada e sostida pola inspiración divina continuou a ser repetida por moitos pastores.

O estilo de predicación de McPherson, o extenso traballo de caridade e as contribucións ecuménicas foron unha grande influencia para o cristianismo carismático no século XX.

Traxectoria

Inicios evanxélicos

En decembro de 1907, coñeceu o seu primeiro marido Robert James Semple, un misioneiro pentecostal de Irlanda mentres asistía a unha reunión de avivamento por suxestión do seu pai. Despois da súa conversión e un breve noivado, casaron o 12 de agosto de 1908.

Pouco despois, os dous embarcáronse nunha viaxe de evanxelización, primeiro a Europa e logo á China, onde chegaron en xuño de 1910. Pouco despois de desembarcar en Hong Kong, ambos contraeron disentería. Robert Semple morreu da enfermidade o 19 de agosto de 1910. Aimee recuperouse e deu a luz unha filla, Roberta Star Semple, o 17 de setembro, despois do cal regresou aos Estados Unidos.

Aimee Semple, seguindo os pasos dos seus pais adoptivos, mantívose activa no Exército de Salvación. Aínda que estaba moi ocupada en Nova York, coñeceu o seu segundo marido, o contabel Harold Stewart McPherson. Casaron o 5 de maio de 1912, e tiveron un fillo, Rolf Potter Kennedy McPherson, nado o 23 de marzo de 1913.

Despois do nacemento do seu fillo, McPherson padeceu depresión posparto e outros problemas de saúde. Tratou de tranquilizarse trasladándose a unha casa máis tranquila, mais a súa entrega persoal ao servizo cristián mantívose constante. Aínda que estivo enferma despois dunha segunda operación no prazo de dous anos, volveu ao que ela denominaba "o chamado de Deus". Pouco despois, a súa saúde mellorou. Despois desta experiencia case mortal en 1913, embarcouse nunha carreira de predicación no Canadá e polos Estados Unidos. De conformidade coa promesa que fixo durante a súa doenza, saíu de casa antes de xuño de 1915 e empezou a evanxelizar, tendo lugar espertares relixiosos; viaxou por toda a parte oriental dos Estados Unidos e despois dirixiuse a outras partes do país.

As súas prédicas eran ao ar libre. Unha vez en San Diego, tivo que ser chamada a garda nacional para controlar a multitude de máis de 30 000 persoas.

En 1916, en compañía da súa nai Mildred Kennedy, fixo un percorrido polo sur dos Estados Unidos. No seu "Coche do Evanxeo" ("Gospel Car"), un Packard do ano 1912 con consignas cristiás pintadas nos lados, evanxelizaba de pé no asento traseiro cun megáfono. Na estrada sentaba no asento traseiro escribindo sermóns e outros materiais relixiosos. En 1917 comezara a editar o seu propio xornal, chamado Bridal Call, para o cal escribiu moitos dos seus artigos.

The Foursquare Church

McPherson na dedicación do Templo do Ánxelus en 1923.

De 1918 a 1922 foi unha predicadora itinerante pentecostal. Despois de predicar por moitos lugares do mundo, estableceuse nos Ánxeles, que ía ser a súa base de operacións. Allí mantivo unha casa e unha igrexa. Primeiro predicou na radio en Oakland (California) en abril de 1922 para chegar a unha audiencia máis ampla.

En outubro de 1922, explicou a súa visión do "Foursquare Gospel" ("Evanxeo Cuadrangular") nun sermón en Oakland. Isto representaba os catro aspectos do ministerio de Xesucristo: Salvador, Bautista co Espírito Santo, Sanador e Rei.

Durante varios anos continuou a viaxar e recadar fondos para a construción dun grande edificio para a igrexa na zona de Boto Park dos Ánxeles, chamada Angelus Temple. A igrexa foi construída, e dedicada o 1 de xaneiro de 1923. A pesar dalgunhas afinidades cos pentecostalistas, as súas crenzas son interdenominacionais. A igrexa tiña unha capacidade para 5300 persoas e enchíase totalmente tres veces ao día, sete días á semana. Nun principio, McPherson predicaba todos os servizos. A igrexa finalmente converteuse á súa propia denominación, chamada a The Foursquare Church. A igrexa destacou polos seus servizos á comunidade, en particular durante a Gran Depresión.

McPherson foi famosa tanto dentro como fóra dos círculos relixiosos. En cada cidade onde se celebraban servizos contaban polo xeral coa asistencia de dirixentes civís, así como os pastores que representaban as igrexas locais de cada denominación. Asegurábase de que o Angelus Temple estivese representado nos desfiles locais de carrozas e participou no célebre Rose Parade de Pasadena. Os seus ilustrados sermóns atraían xente da industria do espectáculo, que ían ver un "espectáculo" que competía co que ofrecía Hollywood. Estas famosas producións atraían xente que nunca pensaría entrar nunha igrexa, e despois presentáballes a súa interpretación da mensaxe da salvación. McPherson cría que o evanxeo debía presentarse en cada ocasión, e que debían empregarse todos os medios do mundo á súa disposición para presentalo á maior cantidade de persoas posible. Os seus sermóns, a diferenza doutros contemporáneos como Billy Sunday, non eran as habituais mensaxes de lume e xofre, senón que se baseaban nunha interpretación máis fácil dos textos cristiáns modernos. Tamén era moi hábil na recadación de fondos, que se realizaban en cada reunión, xeralmente coa petición de "ningunha moeda, por favor".

Desaparición

O 18 de maio de 1926, McPherson desapareceu da praia de Ocean Park en Santa Monica. Asumindo que morrera afogada, os buscadores peitearon a zona. Informáronse de avistamentos de McPherson por todo o condado, a miúdo a moitos quilómetros de distancia. O Templo recibiu chamadas e cartas que falaban de McPherson, incluídas peticións de rescate. Despois de semanas de pistas pouco prometedoras, Mildred Kennedy cría que a súa filla estaba morta.

Mentres o Templo estaba a preparar un servizo conmemorativo, o 23 de xuño, Kennedy recibiu unha chamada telefónica de Douglas, Arizona. McPherson estaba viva nun hospital de Douglas e relatou a súa historia aos funcionarios. Contou que na praia se lle achegou unha parella que quería que rezase polo seu fillo enfermo. Despois de camiñar con eles ata o seu coche, metérana dentro e puxeron un pano con droga contra a súa cara, o que provocou que se esvaese. Finalmente, foi trasladada a unha chabola no deserto mexicano. Cando os seus captores estaban ausentes, escapou por unha fiestra e viaxou polo deserto durante 11 ou 13 horas e uns 32 km estimados, chegando a Agua Prieta, unha cidade fronteiriza con México, arredor da unha da madrugada.

Os fiscais dos Ánxeles tiñan varias teorías sobre a desaparición, entre elas un truco publicitario, e finalmente afirmaron que McPherson fuxira cun antigo empregado, Kenneth Ormiston, aloxándose con el nunha casa dunha cidade turística de California que alugara. Despois de abandonar a casa a finais de maio, a parella viaxou durante as seguintes tres semanas e permaneceu oculta. Arredor do 22 de xuño, Ormiston levou a McPherson a México, deixándoa a 3 millas fóra da próxima Agua Prieta, onde percorreu a distancia restante. En cambio, McPherson mantivo constantemente a súa historia de secuestro e as testemuñas da defensa corroboraron as súas afirmacións.

Gran parte das probas afirmadas contra McPherson proviñan dos xornalistas. A maior parte da investigación contra McPherson foi financiada polos xornais da zona dos Ánxeles por un importe estimado de 500 000 dólares. O segredo dos procedementos do gran xurado de California foi ignorado por ambas as partes cando a acusación dos Ánxeles enviou novos desenvolvementos á prensa, mentres que a evanxelista utilizaba a súa estación de radio para transmitir a súa versión da historia.

O 3 de novembro, o caso ía ser trasladado ao xuízo con xurado fixado para xaneiro de 1927, acusando a McPherson, a súa nai e outros de conspiración criminal, perxurio e obstrución á xustiza. En caso de ser condenada, McPherson enfrontaríase a unha pena máxima de prisión de 42 anos. Non obstante, o caso da acusación tiña problemas de credibilidade. As testemuñas cambiaron de versión e moitas veces as probas parecían ter orixes sospeitosas ou manexáronse mal e perdéranse baixo custodia. O 2 de xaneiro, Ormiston identificou outra muller como a compañeira que estaba con el na casa de campo. Todos os cargos contra McPherson e as partes asociadas foron retirados por falta de probas o 10 de xaneiro. Non obstante, meses de noticias desfavorables produciron unha mala opinión pública duradeira sobre McPherson.

Vida posterior

McPherson continuou o seu ministerio despois de que diminuíse a atención pública pola controversia sobre o suposto secuestro, pero caeu en desgraza coa prensa. Aínda que tanto ela como o seu ministerio aínda recibían gran cantidade de publicidade, a maior parte era mala. Ademais, involucrouse nas loitas de poder na igrexa enfrontándose coa súa nai e a súa filla. McPherson sufriu unha crise nerviosa en agosto de 1930.

O 13 de setembro de 1931, McPherson casou novamente, esta vez co actor e músico, David Hutton. O matrimonio tivo un comezou duro: dous días despois da voda, Hutton foi demandado por alienación de afecto por unha muller, Hazel St. Pierre, á que nunca coñeceu. Resolveu o caso mediante o pago de 5000 dólares a St. Pierre. Mentres, McPherson ausente en Europa, indignouse con Hutton ao descubrir que este se presentaba como "o home de Aimee" na súa actuación de cabaré como cantante. O matrimonio tamén causou alboroto dentro da igrexa, xa que os principios do Foursquare Gospel, que foran establecidos pola mesma McPherson, dicían que ninguén debía casar mentres o seu anterior cónxuxe aínda estivese con vida, que era o caso de Harold McPherson. McPherson e Hutton separáronse en 1933 e divorciáronse o 1 de marzo de 1934.

Pasamento

O 27 de setembro de 1944, pouco despois de dar un sermón, foi atopada morta na súa habitación de hotel en Oakland por unha sobredose de barbitúricos prescritos. Aínda que houbo conxecturas de suicidio, conveuse en que a sobredose fora accidental, como se sinala no informe do médico forense.

McPherson foi enterrada no Forest Lawn Memorial Park Cemetery de Glendale, California. The Foursquare Gospel, cuxa dirección foi asumida polo fillo de McPherson, Rolf durante 44 anos despois da súa morte, continuou en todo o mundo con máis de dous millóns de membros, máis do 90% dos cales fóra dos Estados Unidos.

Véxase tamén

Bibliografía

• Bahr, Robert (1979). Least of All Saints: the Story of Aimee Semple McPherson. Prentice-Hall. ISBN 978-0-13-527978-6. OCLC 4493103. 
• Blumhofer, Edith L. (1993). Aimee Semple McPherson: Everybody's Sister. Wm. B. Eerdmans Publishing. ISBN 978-0-8028-0155-5. OCLC 29184439. 
• Cox, Raymond L. (1983). The Verdict is In. R.L. Cox. OCLC 11315268. Modelo:Self-published source
• Epstein, Daniel Mark (1994). Sister Aimee: The Life of Aimee Semple McPherson. Houghton Mifflin Harcourt. ISBN 978-0-15-600093-2. OCLC 26300194. 
• Morris, James; Morris, Jan (1973). The Preachers. St. Martin's Press. ISBN 978-0-900997-41-9. OCLC 704687. 
• Sutton, Matthew Avery (2009). Aimee Semple McPherson and the Resurrection of Christian America. Harvard University Press. ISBN 978-0-674-03253-8. OCLC 77504335. 
• Thomas, Lately (1959). The Vanishing Evangelist: the Aimee Semple McPherson Kidnapping Affair. Viking Press. OCLC 1575665. 
• Thomas, Lately (1970). Storming Heaven: The Lives and Turmoils of Minnie Kennedy and Aimee Semple McPherson. Morrow. OCLC 92194. 
• Zaballos, Nausica (2011). "La disparition de Soeur Aimee". Crimes et procès sensationnels à Los Angeles 1922–1962: Au-delà du Dahlia noir. Paris: E-Dite. pp. 103–140. ISBN 978-2-84608-310-2. OCLC 779750888. 

Ligazóns externas

• Aimee Semple McPherson Papers, Billy Graham Center Archives, Wheaton College.
• Obras de ou sobre Aimee Semple McPherson en Internet Archive
• "Aimee McPherson" Old Time Radio
• Foursquare Gospel church
• Aimee Semple McPherson biography
• Biography from Liberty Harbor Foursquare Gospel Church