Aforcado, azorrado e desmembrado
Aforcado, azorrado e desmembrado (en inglés: hanged, drawn and quartered[1] ou, por veces, hung, drawn and quartered) foi un tipo de execución implantada en Inglaterra a partir do ano 1351 que era aplicada a aqueles que eran considerados culpables de alta traizón. Porén, este tipo de castigo foi rexistrado por vez primeira durante o reinado de Henrique III (1216-1272) e do seu sucesor, Eduardo I (1272–1307). Os convictos eren atados a un panel de madeira e azorrados por un cabalo até o lugar da execución, onde eran aforcados (até estar a piques de morrer), emasculados, eviscerados, decapitados e desmembrados (cortados en catro partes). Os restos eran a miúdo expostos en lugares importantes arredor do país, como a ponte de Londres. Por razóns de decencia pública, as mulleres convictas de alta traizón eran queimadas na fogueira.
A severidade da sentenza medíase segundo a seriedade do crime. Como se trataba dun ataque contra a autoridade do monarca, a alta traizón era considerada un acto deplorable abondo como para esixir o castigo máis extremo para o infractor. Malia que algúns convictos conseguiron a conmutación da pena e acabaron dun xeito menos ignominioso, durante os diversos séculos que se aplicou esta sentenza moitos homes culpables de alta traizón foron obxecto desta pena capital. Entre eles cóntanse sacerdotes católicos executados durante a época isabelina e moitos dos involucrados na morte do monarca Carlos I de Inglaterra no ano 1649.
Malia que a lei do Parlamento inglés que define a alta traizón aínda fica nos libros estatutarios do Reino Unido, nun longo período de reforma legal do século XIX a sentenza aforcado, azorrado e desmembrado ("hanged, drawn and quartered") foi cambiada por azorrado, afocardo até a morte e decapitado e desmembrado postumamente ("drawing, hanging until dead, and posthumous beheading and quartering"). En 1870, a lei volveuse obsoleta, e en 1998 aboliuse a pena de morte por traizón.
Notas[editar | editar a fonte]
- ↑ O termo inglés drawn inicialmente referíase ó arrastre do reo por un cabalo cara ó patíbulo antes de ser aforcado. Como isto podía provocar que o prisioneiro non chegase con vida, contra o século XIV en Inglaterra o termo drawn referíase á extracción das vísceras e outras mutilacións, en concreto a capadura, o desmembramento e, finalmente, a decapitación.
Véxase tamén[editar | editar a fonte]
 |
Wikimedia Commons ten máis contidos multimedia na categoría: Aforcado, azorrado e desmembrado  |
Bibliografía[editar | editar a fonte]
- Abbott, Geoffrey (2005) [1994]. Execution, a Guide to the Ultimate Penalty. Chichester, West Sussex: Summersdale Publishers. ISBN 978-1-84024-433-5.
- Bellamy, John (1979). The Tudor Law of Treason. Londres: Routledge & Kegan Paul. ISBN 978-0-7100-8729-4.
- Bellamy, John (2004). The Law of Treason in England in the Later Middle Ages (Reprinted ed.). Cambridge: Cambridge University Press. ISBN 978-0-521-52638-8.
