O aeroporto internacional de Trivandrum(IATA: TRV,OACI: VOTV) é un aeroporto indio que serve principalmente ás cidades de Trivandrum, Nagercoil, Kanyakumari e Kollam. É o primeiro aeroporto do estado de Kerala e foi o quinto aeroporto internacional do país en 1991. O aeroporto é unha base secundaria para Air India Express.
A súa terminal atópase a 3,7 quilómetros ao oeste do centro da cidade, a 16 da praia de Kovalam beach, a 13 do parque tecnolóxico de Thiruvananthapuram e a 21 do porto internacional de Vizhinjam en construción. Hai voos cara ao Oriente Medio e o sueste asiático dende este aeroporto.
Ademais das operacións civís, o aeroporto de Trivandrum é usado pola Forza Aérea da India e a Garda Costeira para as súas operacións estratéxicas. A Forza Aérea ten unha plataforma exclusiva para as súas operacións. O aeroporto tamén é o fogar da Rajiv Gandhi Academy for Aviation Technology que leva a cabo actividades de adestramento para pilotos.[1]
En Trivandrum atópase a unidade de mantemento, revisión e reparación dos avións de fuselaxe estreita de Air India, formada por dous hangares xemelgos onde se traballa con Boeing 737, servindo principalmente á frota de Air India Express.
