Adrienne Marie Louise Grandpierre-Deverzy
  | |
| Biografía | |
|---|---|
| Nacemento | 1798 Yonne, Francia |
| Morte | 1869 (70/71 anos) X Distrito de París, Francia |
| Datos persoais | |
| País de nacionalidade | Francia |
| Actividade | |
| Campo de traballo | Pintura |
| Ocupación | pintora |
| Xénero artístico | Retrato |
| Profesores | Abel de Pujol |
| Lingua | Lingua francesa |
| Familia | |
| Cónxuxe | Abel de Pujol |
Sinatura  | |
Adrienne Marie Louise Grandpierre-Deverzy, nada en Tonnerre, Yonne en 1798, e finada en París en 1869, foi unha pintora francesa, alumna do pintor Abel de Pujol (1787-1861), que estudara con Jacques-Louis David. En 1856 casou con Abel de Pujol, converténdose na súa segunda esposa[1] cando el tiña 71 anos e ela 58. Coñecida polas súas pinturas de interiores e historicistas enmarcadas no estilo trobador, tamén ensinou ás alumnas do estudo de Pujol e foi considerada unha profesora comprometida.
Traxectoria[editar | editar a fonte]
Grandpierre-Deverzy expuxo baixo o seu apelido de solteira até a súa voda con Abel de Pujol, cando empezou a asinar como Adrienne de Pujol.
Debutou no Salón de París de 1822 co cadro O estudio de Abel de Pujol; esta obra foi unha das varias imaxes do estudio de Pujol que produciu ao longo da súa carreira.[2] Inspirada polo seu traballo de profesora no estudio de Pujol, este cadro mostra a Pujol falando dun lenzo mentres un grupo de novos estudantes de arte o rodean, outros traballan nos seus cadros, seleccionan pinturas e soñan espertos pola xanela. "Abundan as claves didácticas apropiadas a este xénero, entre as que se inclúen a modelo feminina vestida e sentada na esquina ao fondo á esquerda, copias de tres pinturas relixiosas identificables de Pujol, que se especializou nese xénero, e un estante de moldes de xeso cun torso espido masculino virado decorosamente, aínda que rebuldeiro, cara á parede."[1]
En 1836, pintou outra vista do Estudio de Abel de Pujol. Aquí o rostro de Pujol está oculto por un gran lenzo mentres pinta a unha modelo semiespida, afastada do público e da propia artista. Este xesto de modestia, así como a escultura masculina espida no fondo, cuxo brazo escurece os seus xenitais, son exemplos das limitacións impostas ás mulleres artistas debido aos costumes sociais e os condicionamentos morais do século XIX.[3]
Relacionada co estilo trobador, Grandpierre-Deverzy é coñecida polas súas pinturas narrativas que representan temas extraídos da historia e a literatura europea moderna. Tamén pintou interiores e temas literarios, incluíndo un cadro baseado en Quentin Durward de Walter Scott.[2] Outra escena histórica e literaria é a obra Cristina de Suecia ordena matar a Giovanni Monaldeschi, exposta no Chateau de Fontainebleau,[4] e unha escena da novela do século XVIII Las aventuras de Gil Blas de Santillana.[1]
O seu traballo exhibiuse con frecuencia nos salóns de París entre 1822 e 1855 e incluíu temas históricos, retratos e pinturas de xénero. Recibiu unha medalla de prata da Societé des amis des arts de Cambrai en 1828.
Posteridade[editar | editar a fonte]
O seu nome aparece no Dicionario Universal de Pierre Larousse en 1875.
A súa obra foi redescuberta a partir de 1976 con motivo da exposición universal «Women Artists: 1550–1950», que se celebrou nos Estados Unidos presentando os traballos de 83 artistas femininas europeas e americanas durante catro séculos.
A súa obra Retrato de muller con vestido branco[5] foi poxada en 2018.[6]
Galería[editar | editar a fonte]
-
Alexandre Farnèse, duque de Parme por Adrienne Marie Louise Grandpierre-Deverzy. -
Estudio do pintor Abel de Pujol por Adrienne Marie Louise Grandpierre-Deverzy.
Notas[editar | editar a fonte]
- ↑ 1,0 1,1 1,2 "Royalists to Romantics: Spotlight on Adrienne Marie Louise Grandpierre-Deverzy". Broad Strokes. National Museum of Women in the Arts. Arquivado dende o orixinal o 2 de abril de 2015. Consultado o 7 de marzo de 2015.
- ↑ 2,0 2,1 Harris, Ann Sutherland e Linda Nochlin (1976), Women Artists, 1550-1950, p. 219. Alfred A. Knopf, Nova York.
- ↑ "National Museum". Arquivado dende o orixinal o 3 de outubro de 2017. Consultado o 27 de abril de 2020.
- ↑ "Christine, reine de Suède, fait assassiner son grand écuyer Monaldeschi". Château de Fontainebleau (en francés). Consultado o 2022-12-17.
- ↑ "Adrienne Grandpierre-Deverzy, artiste peintre". L'Histoire par les femmes (en francés). 2019-07-10. Consultado o 2022-12-17.
- ↑ "Adrienne Marie Louise Grandpierre-Deverzy - lots in our price database - LotSearch". www.lotsearch.net (en inglés). Consultado o 2022-12-17.
 |
Wikimedia Commons ten máis contidos multimedia na categoría: Adrienne Marie Louise Grandpierre-Deverzy  |
