Aarhus Gymnastikforening

AGF
Nome	Aarhus Gymnastikforening
Fundación	Club deportivo: 1880; (144 anos) Sección de fútbol: 1902; (121 anos)
Estadio	Estadio de Aarhus, Aarhus
Inauguración	1920
Capacidade	19 433
Presidente	Jacob Nielsen
Adestrador	David Nielsen
Liga	Superliga
2022/23	3.º
Na rede
agf.dk

O Aarhus Gymnastikforening, máis coñecido como AGF, é un club deportivo con sede en Aarhus, Xutlandia, Dinamarca. É un dos clubs máis antigos do país, sendo fundado 1880 como un club deportivo coa ximnasia e a esgrima como deportes principais. Con todo, o AGF é coñecido principalmente pola súa sección de fútbol, que foi creada en 1902 e que milita na Superliga de Dinamarca, a máxima categoría do fútbol dinamarqués.

Gañou 5 ligas danesas e 9 Copas de Dinamarca, sendo o equipo con máis títulos de Copa. En competición europea destacou na tempada 1960/61, cando chegou aos cuartos de final da Copa de Europa, onde foi eliminado polo Benfica, posterior campión. En 1989 alcanzou os cuartos de final da Recopa de Europa, sendo eliminado polo FC Barcelona por 1-0.

Historia

O AGF xogou o seu primeiro partido de fútbol contra o Aarhus Idrætsklub Olympia en novembro de 1902, caendo derrotado por 2-5. Seis anos despois, o club gañou o campionato de fútbol de Xutlandia ao vencer 3-2 ao Ringkøbing IF na final. AGF gañou o campionato de fútbol de Xutlandia sete veces e estivo en tres finais do campionato de fútbol danés antes de que AGF se convertese en membro do recentemente fundado Torneo de Dinamarca en 1927.

En 1911, o club instalou a súa sede na avenida Dalgas e en 1920 comezou a xogar os seus partidos como local no novo estadio de Aarhus, onde xoga desde entón. En 1941, o club trasladou a súa sede a Fredensvang no suburbio de Viby J. Entre 1949 a 1951 o AGF rematou tres veces consecutivas no terceiro lugar da máxima división. Despois de pasar a tempada 1952/53 na segunda división, regresou con forza á primeira división e nas seguintes 12 tempadas gañou catro veces a liga e cinco veces a Copa de Dinamarca. Participou ademais na primeira edición da Copa de Europa, onde perdeu ante o Stade de Reims francés. En 1961 alcanzou os cuartos de final no torneo continental, onde perdeu ante o Benfica, gañador final da competición. O AGF descendeu dúas veces máis á segunda división en 1968 e en 1973, ata que en 1976 iniciou un período de 30 anos na máxima categoría.

A introdución do fútbol profesional en Dinamarca tivo unha grande influencia no éxito que experimentou a AGF desde finais da década de 1970 ata 1998. Coa ex-estrela do Real Madrid Henning Jensen no equipo, este estivo preto de gañar a liga en 1982, pero un empate a dous goles na última xornada, fixo que o título fose para o Odense Boldklub. En 1984 estivo de novo preto de conseguir o campionato pero perdeuno por un só punto ante o Vejle Boldklub. Finalmente, en 1986 o AGF gañou o seu quinto campionato, con destacados xogadores como Flemming Povlsen, Jan Bartram e John Stampe. En 1987, 1988 e 1992 o club gañou tres novos títulos da Copa de Dinamarca.

En 1996, con xogadores como Stig Tøfting e Håvard Flo, o AGF estivo de novo preto de gañar a liga, pero foi superado polo Brøndby IF na penúltima xornada. Con todo, o AGF vingouse ao gañar a final da Copa de Dinamarca ante o Brøndby esa mesma tempada.

En 1998, o equipo rematou terceiro na Superliga danesa, pero os problemas financeiros provocaron uns malos resultados nos anos seguintes. No ano 2000, Peter Rudbæk foi despedido despois de sete anos como adestrador. A partir do 2000, o club experimentou algúns dos seus peores resultados, o que levou ao descenso nas tempadas 2005/06, 2009/10 e 2013/14 . Con todo, o club conseguiu recuperar rapidamente a categoría en cada unha das ocasións.

Na tempada 2015/16, con Glen Riddersholm como técnico, o equipo volveu chegar a unha final da Copa de Dinamarca, onde perdeu contra o København.

Estadio

O terreo de xogo do AGF é o Estadio de Aarhus, rebautizado como Ceres Park por motivos de patrocinio desde 2015, que ten unha capacidade de 19.433.

Palmarés

Títulos nacionais

• Primeira División/Superliga de Dinamarca (5): 1954/55, 1955/56, 1956/57, 1960, 1986.
  • Subcampión (8): 1920/21, 1922/23, 1924/25, 1944/45, 1964, 1982, 1984, 1995/96.
• Copa de Dinamarca (9): 1954/55, 1956/57, 1959/60, 1960/61, 1964/65, 1986/87, 1987/88, 1991/92, 1995/96.
  • Subcampión (3): 1958–59, 1989–90, 2015/16.

Títulos internacionais

• Copa Atlántica (2): 2018, 2020.

Xogadores

Nº Pos. País Xogador 1 PO DIN Jesper Hansen 4 DF ALE Yann Aurel Bisseck 5 DF DIN Frederik Tingager 6 CC DIN Nicolai Poulsen 7 DI SLE Mustapha Bundu (cedido polo Anderlecht) 8 CC ISL Mikael Anderson 9 DI DIN Patrick Mortensen (capitán) 10 CC ING Jack Wilshere 11 CC SUR Gift Links 13 DF DIN Alexander Munksgaard 15 DF DIN Oliver Lund 16 PO DIN Daniel Gadegaard Andersen 17 CC ISL Jón Dagur Þorsteinsson

Nº Pos. País Xogador 19 DF SUE Eric Kahl 20 CC AUS Zach Duncan 21 DI POL Dawid Kurminowski 22 CC DIN Benjamin Hvidt 23 DF DIN Thomas Thiesson Kristensen 24 DI DIN Frederik Ihler 25 DI DIN Eskild Dall (cedido polo Ajax) 26 DF RDC Anthony D'Alberto 27 CC DIN Albert Grønbæk 29 CC DIN Frederik Brandhof 31 PO SUE Viktor Noring 37 DF DIN Sebastian Hausner (vice-captain)

Adestradores

• AG Pettersson (1919–1922)
• Mr. Brown (1922–1924)
• Harald Hansen (1925–1927)
• Alfred Rasmussen (1927–1931)
• Fritz Molnar (1932–1935)
• William von Würden (1936–1937)
• Søren Jensen (1938–1939)
• Knud Aage Andersen (1939–1940)
• Gerhard Müller (1941–1951)
• Peter Vesterbak (1952–1954)
• Géza Toldi (1954–1956)
• Peter Vesterbak (1956–1958)
• Walther Pfeiffer (1959–1960)
• Géza Toldi (1960–1964)
• Henry From (1965–1966)
• Erik Kuld Jensen (1967–1968)
• Kaj Christensen (1969–1973)
• Jimmy Strain (Dinamarca) (1974)
• Henry From (1974–1975)
• Jørn Bjerregaard (1976)
• Erik Christensen (1977–1979)
• Poul Erik Bech (1980–1983)
• Jürgen Wähling (1984–1986)
• Jens Harmsen (1986)
• Allan Hebo Larsen (1987–1988)
• Jens Harmsen (1989)
• Ole Brandenborg (1990)
• Lars Lundkvist (1990–1993)
• Peter Rudbæk (1993–1900)
• Lars Lundkvist e Kent Nielsen (2000)
• Ove Christensen (2000–1901)
• John Stampe (2001–1902)
• Hans Petersen (2002)
• Poul Hansen (2002–1903)
• Sören Åkeby (2004-2005)
• Brian Steen Nielsen e Jesper Tollefsen (2005)
• Ove Pedersen (2006-2008)
• Erik Rasmussen (2009-2010)
• Peter Sørensen (2010-2014)
• Jesper Fredberg (2014-2014)
• Morten Wieghorst (2014-2015)
• Glen Riddersholm (2015-2017)
• David Nielsen (2017-presente)

Competición europea

O primeiro partido do AGF nunha competición europea foi o 21 de setembro de 1955, na Copa de Europa 1955–56, perdendo 0–2 na casa ante o Stade de Reims francés. Desde entón, o club participou en numerosas competicións da UEFA, chegando ata os cuartos de final da Copa de Europa na campaña 1960/61 e da Recopa de Europa na 1988/89.

Véxase tamén

Ligazóns externas

• Datos do club no sitio web da UEFA (en inglés).