A Ponte Maceira, Portor, Negreira

A Ponte Maceira
	; Ponte medieval.
Parroquia	Portor
Concello	Negreira
Coordenadas	42°54′20″N 8°41′47″O / 42.905655553743, -8.6964360606247
Poboación	66 hab. (2024)
	[ editar datos en Wikidata ]

Para outras páxinas con títulos homónimos véxase: A Ponte Maceira.

A Ponte Maceira é unha aldea que está situada na parroquia de Portor, na parte leste do concello de Negreira. É unha poboación que está cruzada polo río Tambre. Segundo o Instituto Galego de Estatística, en 2024 tiña 66 habitantes (34 homes e 32 mulleres)^[1].

Toponimia

O topónimo A Ponte Maceira ten dous elementos: Ponte (do latín ponte) e o fitónimo Maceira, do latín matianaria, maceira.^[2]

Xeografía

Na Ponte Maceira, entre os municipios de Ames e Negreira, está o conxunto monumental formado polo poboado primitivo, un antigo muíño, presa, capela, un pazo moderno e ponte Maceira, construída sobre o Tambre no século XIII, aproveitando os piares doutra romana anterior. Consta de cinco arcos e dous máis pequenos.

Historia

Era paso obrigado no Camiño marítimo de Santiago unindo a cidade do Apóstolo Santiago con Fisterra. Existe unha coñecida lenda, que xa recollera o Códice Calixtino (Libro III, Capítulo I), que relaciona Negreira coa tradición xacobea. A lenda afirma que os discípulos do Apóstolo Santiago viñan a todo correr dende o norte, xa que non atopaban quen acollera o corpo decapitado de seu mestre. Detrás deles, os lexionarios romanos trataban de darlles caza. Os cristiáns cruzaron a Ponte Maceira e viron como, de súpeto, cando o facían os romanos, a ponte veuse abaixo e grazas a esta intervención "divina" conseguiron escapar. Esta lenda quedou reflectida no escudo do concello desde 1866, cando se aprobou o deseño do actual escudo: "O consistorio na sesión plenaria do 24 de febreiro do 1866 deixaba escrito: Este pois é o acontecemento que este concello se propón lembrar no seu escudo de armas". ^[3]

Aquí tivo lugar, nos primeiros anos do século XII, unha batalla entre os homes do primeiro arcebispo de Compostela Diego Xelmírez e as tropas de Pedro Froilaz de Trava e os seus fillos Fernán Pérez de Traba e Bermudo, cos que os enfrontamentos na fronteira do Tambre da Terra de Santiago eran habituais. A Historia Compostelá relata o feito:

...Por este tempo o conde Pedro, aio do rei, cos seus fillos Bermudo e Fernando e os seus auxiliares, molestaba a Compostela e asaltaba frecuentemente aos homes e os gandos. Unhas veces saía ben, outras dáballe as costas ás frechas, segundo as vicisitudes da guerra. Como o pasou na Ponte Maceira, e os moitos homes e armas que perdeu, sería longo de contar...

En arquitectura relixiosa destaca a igrexa románica de Portor.

Galería de imaxes

Ponte medieval.
Cruceiro.
río Tambre.

Lugares e parroquias

Lugares de Portor

Lugares da parroquia de Portor no concello de Negreira (A Coruña)
Fontemirón \| Os Outeiros \| Piñeiro \| A Ponte Maceira \| Portor \| Rebordáns \| Saleiróns

Parroquias de Negreira

Galicia | Provincia da Coruña | Parroquias de Negreira

Notas

↑ "IGE - Nomenclátor estatístico de Galicia. Ano 2024". www.ige.gal. Consultado o 2025-10-19.
↑ López Boullón, Xosé Ramón (2019). Toponimia de Ames. A Coruña: Real Academia Galega. p. 82-83. ISBN 978-84-947823-7-4.
↑ Guía turística do concello de Negreira Arquivado 16 de xaneiro de 2017 en Wayback Machine., 2009, px. 29.

[1] "IGE - Nomenclátor estatístico de Galicia. Ano 2024". www.ige.gal. Consultado o 2025-10-19.

[2] López Boullón, Xosé Ramón (2019). Toponimia de Ames. A Coruña: Real Academia Galega. p. 82-83. ISBN 978-84-947823-7-4.

[3] Guía turística do concello de Negreira Arquivado 16 de xaneiro de 2017 en Wayback Machine., 2009, px. 29.

[1]

[2]

[3]