ADN polimerase II

Na Galipedia, a Wikipedia en galego.
ADN polimerase II
Identificadores
Organismo Escherichia coli
(cepa K-12 subcepa MG1655)
Símbolo polB
Entrez 944779
PDB 3K5M
RefSeq (Prot) NP_414602.1
UniProt P21189
Outros datos
Número EC 2.7.7.7
Cromosoma xenoma: 0.06 - 0.07 Mb

A ADN polimerase II ou DNA polimerase II (abreviada como ADN pol II ou Pol II) é un encima procariótico que polimeriza o ADN e está implicado na reparación do ADN.[1] A ADN polimerase II non é esencial para a replicación do ADN. A súa acción está inducida por danos no ADN. Ten actividade de polimerase 5'→3' e pode facer unha corrección de probas das bases mal apareadas na replicación do ADN[1][2], e non precisa un cebador ou primer de ARN.

Características e funcións[editar | editar a fonte]

O encima ten 90 kDa e está codificado no xene polB. A ADN pol II pode sintetizar novos pares de bases de ADN a unha velocidade media entre 40 e 50 nucleótidos/segundo. As cepas que carecen do xene polB non mostran defectos significativos na replicación do ADN. A síntese de ADN pol II é inducida durante a fase estacionaria do crecemento celular. Nesta fase ten lugar moi pouco crecemento e pouca síntese de ADN. Tamén é a fase na que se poden acumular mutacións por danos no ADN, como curtas lagoas (gaps) que actúan como como puntos de bloqueo para a ADN pol III. Nesas circunstancias, a ADN pol II axuda a superar ese problema porque pode reiniciar a síntese de ADN augas abaixo despois deses puntos. A ADN pol II ten unha baixa taxa de erros, pero é demasiado lenta como para ser útil na síntese normal do ADN.

Ademais de na corrección de erros introducidos pola ADN pol III, a ADN pol II pode estar implicada en diversos procesos celulares relacionados coa reparación de alteracións no ADN causadas por mutáxenos como a radiación UV[3], oxidación etc., bypass de lesións[4], ou mutaxénese adaptativa. In vitro demostrouse que interacciona con proteínas accesorias da ADN pol III, e protexe os extremos 3' mal apareados da acción da ADN pol IV.[5]

Notas[editar | editar a fonte]

  1. 1,0 1,1 Banach-Orlowska M, Fijalkowska IJ, Schaaper RM, Jonczyk P (2005). "DNA polymerase II as a fidelity factor in chromosomal DNA synthesis in Escherichia coli". Mol. Microbiol. 58 (1): 61–70. PMID 16164549. doi:10.1111/j.1365-2958.2005.04805.x. 
  2. Fijalkowska IJ, Schaaper RM, Jonczyk P. DNA replication fidelity in Escherichia coli: a multi-DNA polymerase affair. FEMS Microbiol Rev. 2012 Nov;36(6):1105-21. doi: 10.1111/j.1574-6976.2012.00338.x. Epub 2012 Apr 5. PMID 22404288. [1]
  3. Masker W, Hanawalt P, Shizuya H. Role of DNA polymerase II in repair replication in Escherichia coli. Nat New Biol. 1973 Aug 22;244(138):242-3. PMID 4580165. [2]
  4. Fujii S, Fuchs RP. Interplay among replicative and specialized DNA polymerases determines failure or success of translesion synthesis pathways. J Mol Biol. 2007 Sep 28;372(4):883-93. Epub 2007 Aug 2. PMID 17707403. [3]
  5. Damian Gawel, Phuong T. Pham, Iwona J. Fijalkowska, Piotr Jonczyk, and Roel M. Schaaper. Role of Accessory DNA Polymerases in DNA Replication in Escherichia coli: Analysis of the dnaX36 Mutator Mutant. J Bacteriol. 2008 March; 190(5): 1730–1742. Published online 2007 December 21. doi: 10.1128/JB.01463-07. PMCID: PMC2258657. [4]

Véxase tamén[editar | editar a fonte]

Outros artigos[editar | editar a fonte]