Český rozhlas

Logotipo dende 2013

Český rozhlas (ČRo, en galego, Radio Checa) é o servizo público de radiodifusión de Chequia. Fundada en 1923, xestiona hoxe en día catro emisoras de fm a nivel nacional, outras catro por Internet, catorce emisoras rexionais (unha por rexión da República Checa) e máis unha emisora internacional, Radio Praga. É membro da Unión Europea de Radiodifusión dende 1993.

Historia[editar | editar a fonte]

A Český rozhlas comezou a súa andaina, baixo o nome de Radiojournal, o 18 de maio de 1923. Isto converteu á, entón, Checoslovaquia, unha das pioneiras de Europa na radiodifusión, só adiantada pola BBC.^[1] A primeira retransmisión foi dende unha carpa militar en Kbely (ás aforas de Praga). A sociedade estaba en mans privadas e emitía grazas a unha licenza do goberno. Fora unha iniciativa dun grupo de xornalistas e empresarios, entre os que destacaba Radioslavia, unha empresa de receptores de radio e accionista principal. Financiábase grazas ás taxas que pagaban os propietarios dos aparellos de radio. Con todo, estes ingresos foron insufiencientes en 1925 o goberno checoslovaco fíxose cunha participación maioritaria. Xa nos primeiros tempos procurou atender á diversidade cultural checoslovaca facendo programas para alemáns, rutenos e húngaros, ao tempo que producía boletíns en inglés e esperanto para o exterior.^[2]

En 1933 ocupa un edificio na céntrica rúa Vinoradská da capital checa. Esta sede foi danada en maio de 1945 pois foi escenario dun choque polo control da radio entre as tropas nazis e a resistencia checa durante a insurrección de Praga. A emisora instaba á organización contra os ocupantes repetindo a consigna "chamando a todos os checos! Vide axiña coa vosa axuda!" que se converteu un símbolo dese episodio.^[3] A partir de 1948, Český rozhlas foi un instrumento clave na comunicación social da ditadura comunista checoslovaca, así a partir dos anos 50 interferíu o sinal de Radio Free Europe. Os intentos de abrirse á pluralidade informativa desenvolvidos ao abeiro da experiencia da Primavera de Praga foron freados coa invasión soviética (1968) que deu paso a purgas de moitos xornalistas e un férreo control das autoridades sobre a emisora.^[2] Co regreso á democracia, a radio adoptou como sinal identificativo unha versión do comezo da "Sinfonía do novo mundo" de Dvořák, que xa fora empregado nos anos 30. En 2021, a radio pública checa emitía en FM, MW, LW, Internet (Streaming), DVB-T, DVB-S/S2, DAB/DAB+.

Ademais da súa actividade radiofónica, Český rozhlas colabora co Premio da Radio Bohemia e con sete conxuntos musicais: destaca a Orquestra Sinfónica de Praga pero entre os que tamén hai bandas de novos músicos ou folk.^[4]

Emisoras[editar | editar a fonte]

Radiožurnál: emisora con programación informativa e musical
Dvojka : centrada no entretemento familiar
Vlatava: estación especializada en música clásica e cultura.
Plus: radio informativa
As emisoras rexionais: ČRo Brno, ČRo České Budějovice, ČRo Hradec Králové, ČRo Karlovy Vary, ČRo Liberec, ČRo Olomouc, ČRo Ostrava, ČRo Pardubice, ČRo Plzeň, ČRo Region, ČRo Sever, ČRo Vysočina, ČRo Zlín.
As emisoras dixitais: ČRo Radio Wave, ČRo D-Dur, ČRo Jazz, ČRo Rádio Junior, ČRo Rádio Retro, ČRo Sport e ČRo Pohoda.^[5]
Radio Praga Internacional: servizo exterior producido en alemán, checo, español, francés, inglés, e ruso.